*
Ing e mi panayan, awni, dinatang na,
likuan mu na kami, mine na ka banua.
Ing e mi pangādi, miras mu rin pala,
keni king siping mi, ngeni ala na ka.
**
Ing panalangin mi,e mipanusigan,
uling memun naka, keti king sikluban.
Misna man kasalpak, sukat ming tanggapan,
awa man, masakit, iti ing katutuan.
***
Ing mengalabasan, bala mu napun pa,
napun a king isip, na pa kasagiwa.
E na makalinguan, ing pisulung tula,
anggiang kapilan man, e iti mawala.
****
King suluk ning diwa, balikbalikan ku,
ing malagung aral, a pepamana mu.
Pakamalan ku la, reng kekang amanu,
gawan kong guyabnan, nung nu ku man atyu.
*****
Apusan kung miuman, ing binie mung lugud,
king Amanung Sisuan, a ngeni guguyud.
Ban e malumpawi, namung kabud-abud,
ya mu ing amanung, luguran ku kabud.
******
Pakatandanan ku, ing pamangambul mu,
king maybug miragsang, mal tamung Amanu.
Ika ing gawan kung mayap a modelu,
gambulan kia naman, ing salita tamu.
*******
Lual keng pasibayu ing kanakung pluma,
a maluat na mu riin e mamagus tinta.
Mamikudta naku king amanung sinta,
kalupa na aniang kayabe ra ka pa.
********I
ng likuan mung bakas, kayu yang tuntunan,
ipaglualu ke, ing Amanung Menan.
Ding salitang dayu, kaku lang salakan,
ban midalise ya, ing Amanung Sisuan.
********
Mekad ing misyun mu, keti meyari na,
uling deng angel na, ring dinakit keka.
Ing inumpisan mu, ibalayun mi ya,
Dispu, Apung Felix, magpaynawa na ka.
Rodel E. Gozum
02 Nobiembre 2025
San Simon
