1.
Piglumon da namu ring aliwang tau
ing mamamanyawad karing kandidatu’
agyang bularit mung alalang pambaryu’
e ra palagpusan aplit mag-negosyu’
2.
At ing masulit pa lilibaran do ngan
ding kakandidatu deting anyaranan
king wa man balu dang walu la mu bilang
detang abotu ra neng atin alalan
3.
Dapot ing bageng yan karela e ba’la
laganasnan do ngan manakitan la sa
ing ugali ra pa a makasukmama
na lang kapamilit e ra balu’ing ala
4.
Nung e ro adinan agad lang teterku
at pagmaragul ing e ra la ibotu
ing e pa mayap king karelang istilu
panyiran da la pa mabilug a baryu
5
e la miratun den pane lang dudurut
at manenaya la karetang babagut
ustung abalu rang atin ng lilibut
karing mangampanya kabud na la lalsut
6.
nu man ing ukasyun; pakibalitan da
atyu lang pane ren at makapanaya
karing kandidatung makipag-bisita
lalu ding balu rang makapal a bulsa
7.
makiki-ayli la king e ra antindian
a temang mibusni ketang piyarapan
king bista’t man deti e do papansinan
magtilalid la rin anggang kabukasan
8.
Nukarin mang baryu karing balang balen
dakal lang makanian kareting memalen
at king pauli ding taung anti karen
inia ating lalto “CORRUPT ” karing lider
