e ko bisa, tuknang ko pa,
alang patlang, pamañira,
uli na ning, pulitika,
megulu ya, ining bangsa.
samantala, daranup la,
deng memalen, kawang kawa,
pondong tipun, megamit pa,
ning matakong, Kongresista.
kayabangan, ipapaskil,
dalang gewa, e masinsin,
balamu pin, ‘yang minangkin,
‘ting porsientong, balang kusing.
dati rati, sanggang dikit,
pilang banua, e mimikit,
ating planu, deng sisitsit,
tronong guintu, alang palit.
dening Hudas, kabud lilto,
ubingan lang, memaniglo,
mengamantsa, ing prinsipyo,
meging kanser, e aulo.
nokarin ya, mangaparas
balen tamung Pilipinas?
deng memalen, mengasagsag,
kaguluhan, e mayawat.
deng makwalta, mituran man,
gabutil mu, kayang kaban,
pakalulu, danup takman,
king gobiernong, ‘lang masabal.
mimisip ku, misan misan,
e magboto, king halalan,
sukat ala, kang pilinan,
metung lamu, king pitungian.
