Kapilan la kaya rugu misaplalá
ring sablang balen king bili nang malugmá
nung ding sadia ampon ngeni manibalá
mipapanarus la’t mipapanuliksá
mipapatlalu at mipapaningayá
nung ninu ring mayap at ating agawá
nung ninung lamiran at migpakasasá
king kaban ning baleng gisan ding kinangwa
Ding balayan tamu e nala mikabus
ketang pagbitkil a kareti gagapus
nung ding galame ra o ring insurektus
deting pulitiku tuki la king agus
na ning kapanyiran ampo pang indredus
a yamut ding sablang puna at batikus
nung e ro sara ring karelang balungus
nasang kapayapan matda neng tibubus
Nung ding manungkulan karing balang baryu
makiabe mu namang lulub ketang gulu
apakit da sana karing pulitiku
itang suporta rang alang pamagbayu
bista’t man balu ra nung nanu ing ustu
bubulagan no ning bukut dang prinsipyu
ing makaniang dapat nung e na magbayu
balen at memalen ding masakripisyu
Pasari ning gulu matitigagal ngan
ing sablang proyektu king kapanyulungan
nung e ne tau ning meyor ing kapitan
o ning kongresista ing pun ning balayan
iti metung ya king masalang katutuan
a mengapalyari king mengalabasan
agiang mayap la pa rening manungkulan
nung benggatibu la ala tang puntalan
Ing pamisanmetung kailangan neng biná
ding balang balen king ba lang misaplalâ
at ing paginakit king pusu ring sablâ
nanu man sa ita kalinguan da na pâ
at ding manungkulan mikasundu no sâ
ban ing pangaku ra mayan dang agawâ
uling dakal la ring taung maninasâ
king kapanyulungang mayayalang kalmâ
E yu sa pabustang king pusu mamale
itang sukal a lub a yamut ning pate
at karing supapi ra reting galame
ketang kagutgutan e no sa makiabe
mamilatan la sa king ba lang salese
ding manungkulan a pane rang kayabe
pasari ning gulu king ditak a bage
pati ring memalen rugu midadame
