CATACUP ning silim ining Bertung kirat
bala-balikid yang king dalan maglacad
nung king palage na alang macayalac
caretang tanaman agad na nang mucyat
carin matiaga yang manenayang oras
ban macapanyilip caretang mibablas
Pablasang kirat ya ing metung nang mata
nung inia pin iti e ne miglolo pa,
tatacut yang magcang king cayang itsura
insultuan de mu ring nasang paglolon na;
inia king idad nang migit nang kwarenta
I Bertu megi yang baintaung matwa
At uli na pin ning alang caranasan
king mayumung dake na ning capalsintan
mistula ya waring asung mamumulang
neng macaramdam yang pali ning catawan;
Inia’ing pamanyilip keyang augalian
anti waring iti babye capaldanan
Casama’nang dili uran a tikatik
uling caring impun bandal neng papanic
tatacut neng bina nung biglang maulit
ing penandaman nang milalu casakit
iniang dagusgus ya’t meyacdac a buldit
king putut a kwayan a carin da kebit
Inia ketang misang manuldul masican
gugulis ing kildap a sobra cataram
agad yang kinuldas at caras na lalam
caring gumamela ume yang migpampan
king lalam dang bale nitang tatang Damian
cari’na penayang mibulus ing uran
Sactu naman itang atupan nang bale
marakal ya aslat at busbus king lande
inia sinawa ya matang maglalawe
karing makapaldang lalabas nang pane
ban lalung mibastag ketang pamanalbe,
pigkeran ne niti ing ikit ng dase
Dapot iting dase a keyang kesatan
dacal lang salusad a karin migbusal
agad yang tinikdo king ba’nong pagpagan
inia mipucpuc ya ketang barakilan
at king tulid na ning keyang kepucpucan
carin ya magkera ining tatang Damian
Ing patac ning uran pablasang masigla
ding tau king babo e ra aulata
maging itang matwang carin macakera
e na rin ayalac nian maclac neng bagya
dapot itang Damian biglang migsalita
maco ca ken nganang ginulisac bigla
Nung e ca pa maco keca ke ibarug
ing bulugang kwayan a gewa cung tucud
inia ining Bertu agad neng kinimut
carug carug salu, linakad pagulut
kabud-abud namu ating gulping merug
Pilata’ning keyang tundun ampon buntuk
Mipa-pulai yang cacapac a baba
e nacu pu mulit ngana pang gagaga
ing e na balu n’yan ing sese nang pusa
Ing pakisabyan na ning matwang mimimwa;
alang merug keya adalpak n’yang bigla
itang macacalat a lumang piruya!
Vhelle V. Garcia
April 24, 2014
Abu Dhabi, U.A.E.
