“Ala agyang nanu,” agpang pin kang Mayor
Leonora Capule-Wong na ning San Simon
Inggil kening metung a‘public construction’
A pakialaman da rening kandidatung
Diputadu para king Kuatru Distritu
Ning Pampanga at ing bisang pasibayu
A maging Alkalde king balayan mismu
Nung nu’ merapat ing paksa ning kolum ku.
Pasari namu ning buri rang asamsam
Ing kreditu para king pamipagawang
‘Covered court’ kaniting mesabing balayan
Bista’t iti e re sukat taginan man
Uli ning alalu pa keng ‘public office’
Ban pasinayan ing proyektung mebanggit;
At den antimurin ala lang unabis
Kapasidad para ilang talan pilit.
Keng pamipagawa kaniting ‘covered court’
Insa man karingkatiket nang Bondoc,
Pablasang ding badyet ing NHA kabud
Ing minye kang Binay at keti no’ tituk.
Bistamanking gamat na ning Diputada
Anna York Bondoc la dinalan ding pera;
At waman den PDF la para keya,
Agyang kapatad neng Rimpy, bawal ita
A ipalagyu ne kaya ing proyektu
At mibie pati na karening kreditu;
Kaibat, ‘Salamat Rimpy!’ ing isulat yu
King anti kaniting gastus ning gubyerno?
Inya nanu’t e ya pin mitas ya prisyun
Ing mapuring “Woman of New Generation”
Ning ngeni asensadung balen San Simon
King kapalpakan nang iti ning Ex-Solon?
Nanu pang papil na, antining ing sadya
Nang posisyon Rimpy mipasa kang Anna
Inyang 2004 – at ngeni buri na
Ya na namang talan? Dapat yang manaya!
At nung sumambut ya kanita ya gagad
Manigobra ampon e magtamad-tamad
At e ngening pati e kaya ing tayad
Buri nang atalan karing keyang gamat.
At e pa man ‘campaign period’ dakal na la
Ding pakasabit a ‘E-pal’ keni’t keta,
A nung nu “Cong Rimpy” ing pangasulat na
Ning lagyu na karing posters a kebit da.
Para nanu at king makananung bage
Ing lagyu nang Rimpy yang masasaglawe?
Para king proyektungkang Ate na mibie
Kapamilatan ning PDF nang pamye
Ning Kongreso para karing Diputadu
Ban gamitan karing karelang Distritu,
Pero i Rimpy ken ing papil na nanu,
Ngening alayu pa babo entebladu?
‘It is plain, vulgar, grabbing what’s not his due’
Ngana pin ning Editorial na ning PUNTO
Ketang pang-Mierkoles at Huebes niting isyu
Ning salukuyan a bulan ning Febrero.
Ding mipamye pondu para keng proyektu
Kualta no’ ning balen at e la nung kenu;
At lalu nang e la kang Anna’t Juan Pablo,
Inya karen nanung utang a lub tamu?
Banting magpayabut “Dakal a Salamat”
Lalu na kang Rimpy a e pa pu dapat;
Keng salita tamu, nung pasapyo yagkas,
Yaus keng makanyan: MAPAÑGUANG DAMULAG!
