Karas keng tatag a pamanalakaran
At tepangan, metung ne karing mapilan
A meging bulalag keti Kapampangan
Ing melapupuring Vivencio Cuyugan
Pablasang kanitang panaun a nu’ya
Mindaywan karin king bansang Amerika,
Misan a pisaup de ring kepate na,
Deti ikua no’ ngang mimin apatomba
Keng kasikan tumbuk at bilis mangilag
Nung inya malagua na lang apakasat
At kesukul uling e mipyansan agad,
Migit-kumulang ‘two hundred thousand dollars’
Pero pauli na ning malasakit da
Ding ka-Pilipinu karin Amerika
A menupang ‘counsel’ a de kampanilya
Ban ipamingwa ne, e meluat milual ya.
Pero kabang atyu kilub ning sukulan
Ya ing meging laman da ring pahayagan
Karin Chicago at kalipi tang’ daywan
Angga king muli ne keti Kapampangan.
At e binang meluat king keyang panuli,
Mil nuebe syentos beinte syeti, mepili
Ya bilang pang-aduang pamuntuk – nung wari
Karing ‘vice mayor’ ngeni king keyang bili.
At ketang mil nuebe syentos trenta’y uno
Yang minunang meging mayor San Fernando
Lalam ning ‘Commonwealth’ a pamangubyerno;
At yang ‘first Socialist mayor’ keti mismo.
Y Mayor Cuyugan yang bosis kanita
Ding pakakalulu (agyang nyang atyu pa
Karin Chicago ning bansang Amerika)
At talapamingwa ding talapagobra.
Bistama’t itinan kabilang deng lubus
Detang atinan o ‘upper class’ pin kabud,
Pero pinili na itang makipamuk
Para king kimutan ning idolohiyang Huk.
A minanib kang Don Pedro Abad Santos
Keng ‘Socialist Party’ a binang mibantug
Keti sentral Luzon ban ganap maputut
Ing e ustung dapat da ring propetaryos.
At agyang inya pang kaselanselanan
Ning panaun e na bitasang gilutan
Ing obligasyon na para king balayan,
Sumangid ning iti keyang ikasintang.
Bilang mayor, pintan ne ing PASUDECO
A manugse katas at sapal ning atbu
Keng kailugan ning balen San Fernando,
At inutus nang yan isara reng todu.
Ing kanita konsehal at meging Alkalde
Na ning Menila, Manuel C. dela Fuente
A kakampi karing interes da reti,
At binsagan ne pa kanung ‘no-brain’ iti
Kalupa ning keyang gewa king Chicago
Inamun ne iti king metung a ‘Duelo;’
Pero bista’t tinggap na ning galgahu
Ing amun ning tau keti San Fernando
E ne man siniput king pisabing oras
Ining Dela Fuente pauli na mekad
Ning akasubuanan namu niting tinggap
Ing amun, pero ya e timbang a bayag?
Ban pakilabanan ing tune gereru
At talataguyud king talagang ustu;
A nu’ angga na king kinwa ne nng Ginu,
Y mayor Cuyugan marangal yang tau!
