Mula nang kung sino ang nagpasimula
Ng ‘contractual base’ sa mga manggagawa,
Panig ng ‘employer’ lang itong sumaya
Habang sakbibi ng lungkot ang kabila.
Kaya kapag napapanood po natin
Sa TV ang isang patalastas mandin
Ng isang Senador na mapagmagaling,
Na aniya ang ‘labor’ dapat palakasin
At dagdag trabaho umano ang dapat
Upang lumiit ang bilang ng mahirap,
Yan sa ganang amin di makababawas
Sa ‘unemployment’ na lalong tumataas.
Ipagpalagay nang may sapat na bilang
Ng kung anong klaseng puedeng mapasukan,
Pero sanhi nitong palaging ‘contractual’
Na uri ng ating pagtatrabahuhan
Kailan at papano tayo mapipirmi
Sa pinapasukan kung ang ‘security
of tenure’ ng isang kawawang ‘employee’
Ay wala naman ding katiyakan pati?
Laban sa maraming ‘employer’ na tuso
Na anhin na lang ay di bayaran nito
Ang pinagpaguran nitong nagtrabaho
Sa kanya, gayong siya’y kumita ng husto!
Aywan lang kung anong posibleng nagtulak
Sa kung sinong Solon na author ng batas
Na gawing contractual ang pagpapatupad
Ng mga bagay na sadyang di marapat.
Na nagsilbing giya na pina-iiral
Ng mga employer sa kasalukuyan,
Kung saan tunay na nakapamihasnan
Nila pati na ang grabeng panlalamang!
Gaya halimbawa kung medyo mataas
Na ang sahod nitong hindi naman tamad,
Yan para lang makamenos ng pambayad
Posibleng gawan ng bagay na di dapat.
Upang mapatalsik at di ma-obligang
Ma- regular ito sa posisyong tangan,
Sanhi nga lamang ng di makatarungang
Pamamalakad sa pasahod kung minsan.
Na aywan kung bakit tama’t mayrun tayong
Mga mahuhusay at batikang Solon
Ay di n’yan mabigyan ng tamang solusyon
Itong ‘unfair labor practice’ hanggang ngayon
Na namamagitan sa mga ‘employer’
At ng ‘labor sector’ (na animo’y pader
Itong naghahati) to resolve this matter
In such a way it could be impartial and fair.
Na di tulad nitong ang kapitalista
O ang employer lang ang panalo tuwina
Sa ‘contractual base’ na pamalakad nila,
Kaya ang ‘labor force’ talo palagi na.
At hanggang pagtanda walang maasahang
Anumang probetso o benepisyo riyan
Mula sa kung sino na pinaglingkuran
Nito ng di man lang napirmi ni minsan.
Kasi nga, matapos makapagtrabaho
Ng tatlo o hanggang ‘6 months’ yan ay piho
Nang sisipain sa napasukan nito,
Kaya papaano ma-‘regular’ ito?
Aba’y kung sino ka na may malasakit
Sa panig ng ‘labor’ gumawa ka kahit
Munting pagkilos lang para maibalik
Sa kalagayan n’yan ang tama’t matuwid;
Upang kahit man lang sa ganyang paraan
Ay makatulong ka’t iyong masuklian
Ng ika’y tunay na serbisyong pambayan
Ang pagkatalaga sa’yo sa Batasan!
