King metung a plantang aspalto Baculud
A nu’ya magobra ing diaskis a Pisuk,
Antimong ‘messenger’ nang Engineer Bonus,
Yang pekamasipag at malaguang yutus.
At e reklamador inya’ing Inhinyeru
Matula yang bina king keyang serbisyu,
Bista’t adua la ring kayang mensaheru,
I Pisuk ya ing mas panwalan nang ustu
Lalu’t piraplanan ing buri nang yutus
Uling iti e ya pate-pate kimut,
At yamu kabud pag-tiwalan nang lubus
Neng ating yang lakad o bisa yang luslus.
Misan, mitauli yang manga medya ora,
E ne disan Pisuk ing kapagobra na;
Ing ‘Timekeeper’ ya na’mung sinabi keya
King i Engineer pin Menila ya minta.
At ngana pa, mekad lampas nang alas dos
Bayu magbalik ing maganaka rang Boss;
Inya makanyan nang aisip nining Pisuk,
Muli yang maugtu, ala muring mutus.
Kabang maglakad yang pa-uli karela,
Nung nanu’ing masanting a sukat gawan na;
A, kaybat meugtu, maka-iskor ya pa
King keyang malagu at seksing asawa.
Karas na, tahimik king karelang bale,
Gewa na… sinilip yang pakakalale;
I Engineer Bonus malino ikit ne
King seksing misis na ya ing makasake.
Maybug yang mibulang – Pisuk king ikit na,
At ume ne sanang king penandit a ita
Paldakan ing pasbul… oneng aisip na
Ing kang Engineer pin pihung mabistu ya.
Nya memigil nia mu ba’yang e marakap
Ing migbulakbul ya, mebating e oras
Ning paglual king obra… at ‘dismissal’ tiyak
Ing parusa inya dapal yang tiniplad!
Nung e ya balbal a malutu ing diablus
Ya’pa rugu ining tiniplad melaus
Kesa marakap ya ing mamuguk-muguk
At pihung masipa kang Engineer Bonus?!
(Nung misan, king bie ning tau malilyari
Itang mangibabo ing takut ban iti
E na pagmasakit itang maplas dili
A miras keya neng masipit yang pilmi.
Iting poesia a kanakung sinulat
Pikatsa niamu ning kekong talasulat
Ban magsilbing pikatulan at sagakgak
Keng ayli ring biasang sake isyung tumpyak).
