KANITANG e me pa ikuang apatangu
King yain mung sinta ing anak kung bungsu,
Kilub ning aldo-aldo nanan mu na rugu
Keti na ka tuknang, tanuran mu niamu.
E ra ka man yutus ban mangutud dutung
Ta’ka mikalundag, mangalap palakul;
At keta pelalung masias a palumpung
Pagkapilitan mung atilad maranun.
Mipmu nong’ danum ding tapayan a kapsa
Lalamnanan mu pa pati na ring banga;
Nung misan pelalung kuran at balanga,
Kakapmuan mu naman ampo pa ing banga.
Agiang e ka ‘nabis biasang mugit sarul
E ra ka ayoyo king dayat durulung;
Apibabata mung kilub patingapun
Lumba-sumaka ka babo ring tarundun.
At agiang ala kang tibukbuk o kupya,
Maguanta kang pali libutad taldawa;
Misan, ala ka mang pangambil bitasa
Apibabata mu, akakit mia mu sa’.
Pero nanu’t ngening ikua mu ne rugu
Ing solung anak kung pangane at bungsu,
Mangutud mang dutung e mu na’ta balu,
Danum man ala na, metung mu mang tabu.
Ngeni ka mebistung tiktak ka katamad
At alang nanu mang king bie pamagsikap;
E na ka bisa mang tumalas keng burak
O magpastul karing sese kung damulag.
Aba, makananu me rugung apakan
Ing kekang asawa keng katamad mung yan?
Aku pa wari ing magdusang mamusan
Pari karing maging bunga mung temaran?
Yan ing kalbaryu ra misan ding pengari
Nung e la mikalmang manuyang da reti,
Lalu pa’t antimo king bili kung ini,
Akung maki anak kaniting babai;
Bisa ku’t e bisa aku na ping pilmi
Ing manese karing palipi na niti,
At yan anti ku nang penitensya pati
Ngening ing anak ku e rugu misuerti.
At ing atupan na nung wari keng asu
Ya kabud ngara pin ing kaung man kanu
E na’gawa uling ala’ng kabud bisyu
Nu’ne makadamag kilub na ning kubu.
Paburen ku no’man waring mate danup
Pati ring apu ku a kakung kalukup
Ngening ining tata e re rugu kikimut
At e na apakan sarili nang asbuk?
Natural mu karing aliwang pengari
Ing malugud karing keyang maging suli,
Nung inia aku na ing papakan pati
Kening lamaran a manuyang kung ini!
