May nagpanukala na r’yan ng ganitong
‘Bill’ na diumano ang tunay nitong layon,
Alisan ng bulsa ang police uniform!
Sabi ko, ang daming dapat ipairal
Na makabubuti sa’ting kapulisan,
Ano’t sa ganito pang pamamaraan
Ninanais natin silang ‘mabihisan’?
At anong magandang epekto ika ko
Sakali’t ya’y maging batas mang totoo,
Kundi ng posibleng malaking insulto
Sa men in uniforms ang bagay na ito?
Ang alisan sila ng bulsa di angkop
Na solusyon laban sa pangungurakot,
Pagkat kahit yan ay hubaran mong lubos
Ay may mapaglagyan para makaraos.
Manapa ang dapat isulong marahil
Ng mga Solon po nating magagaling
Ay makapagpasa yan ng kakaibang ‘bill’
Na mas epektibo sa pananaw natin.
Bakit hindi sahod nila ang isulong
Na maumentuhan upang sa ganoon
Ay di maisipan n’yan ang pangongotong
At iba’t-iba pang dilhensya sa ngayon?
At di gaya nitong ang kuwarta ng bayan
Ang ninanakaw ng mga masisiba riyan
At ika nga’y mga walang kabusugan
Nating ibang nasa palingkurang bayan.
Kung saan pa mandin itong matataas
Ang posisyon sa gobyerno ang matatalas
Ang gunting sa grabeng pagdukot, paglaslas
Sa kabang-bayan ng bansang Pilipinas!
Upang ang gaya r’yan nitong pati barya
Ay kinukuha sa tsuper na biktima
Ng pangongotong ay lubos mawala na
Kapag nabigyan ng sahod na maganda.
At ang isa pa r’yang dahilan kung bakit
Dumami ang mga ‘hulidap’ na pulis
Ay dala na rin ng kung sino ang higit
Malaki ang kita sa Senate at Congress
Ang siyang kapural ng nakawan ika nga,
Kaya kanino pa matututo kaya
Ng wasto’t marapat ang nasa ibaba
Kung ang nakikita nila ay di tama?
Kung inaakala r’yan ng ibang Solon
Na ang ‘no pocket uniform’ ang solusyon
Upang matigil ang grabeng pangongotong
Ay maling-mali po sila ng opinyon.
Kasi hangga’t itong mga lider mismo
Nitong Inangbayan natin Kabayan ko
Ang walang bagay na maiturong wasto
Sa lahat ng nasa sangay ng gobyerno
Hanggang sa tuluyang mundo ay magunaw
Ay di mawawala r’yan ang magnanakaw
Na opisyal natin hangga’t ito mismong
Ilang ‘lawmakers’ ang kwenta kontradiksyon
Ng mga batas na dapat ipa-iral
Na sila rin bale ang ‘law breakers’ minsan,
Kaya dumarami ang mga tulisan
Na naglipana r’yan sa kapaligiran
Dala palibhasa nitong sila-sila
Ang author mismo ng batas na pinasa,
Natural lamang na ligtas yan tuwina
At walang anumang kapanga-pangamba!
