king magaslo a tigtigan,
ing lua mung maybug tumulu
anggang binit mung kawatan.
Ding danupan mung kapatad
at ing indu mung salunan,
ban ayakmul mu ing dine,
ila ring kekang isipan.
Lalam da ring patda-sinding
sulung miyaliwa kule,
Igiling meyng papaluan mu
king arap da ring manalbe.
Kabang ing dimut a saplut
lulubasan mu at ugse,
ing mapagkunwaring timan,
karing labi igulis me.
Ding parukyanu a lupang
atin makapal a bulsa,
Samasnan mu lang lantungan
kabang dudurutan mula.
Ban kayari nang tinigtig
ning makabaldugang kanta,
ati’nang managkat kekang
lukluk king kayang lamesa.
Ustung milukluk na ka at
ume na nakang kandungan,
ing alak a misna tapang,
samalan mu nang aldukan.
Ban potang ding kayang gamat
ati’na lang panintunan,
makapal na ka marine
agawa mu nang pibatan.
Nanu man ing kayang sabian
maski asna king karinat,
tanguanan mu namu sana
at e na ka sasalabat.
Uling ing mas maulaga
agawa mu ing maglambat,
ban keta king lamesa na
manakitan kang masampat.
Nung mapilit ka mang tuki
potang agkat na kang lumual,
ban apaulu mu ne ing
masakit a indu mung mal.
ketan mu nia ing labi mu
kabang maliyari’yng bawal
at maniawad na ka’ng tawad
karing santu tamung banal.
Tutu, misna king kababa
ing obrang kekang pinilî,
pauli ning ing dangalan
mu yang kekang pamisalî.
Dapot ing matsurang palad
maski na e mu ya burî,
King pataram kinalawat
ka uling gipit ing bilî.
Diwa neng: RODEL GOZUM
Poeta Laureadu,
ning Sto. Domingo,
Minalin, Pampanga
