Tsinelas na mu ing kanakung pamasku

    237
    0
    SHARE
    Paruminggu bayu pa miras ing Pasku
    Pengaku nang Tatang ing isali na ku
    King SM Pampanga, sapatus a bayu
    A kaku ibie na antimong pamasku.

    Dapot pitung aldo bayu miras, datang
    Ing kapaskuan dindam ku mismu kang Tatang,
    Ing ila mepilit lang mig-welga laban
    Keng pamalakad na ning Amu rang daywan.

    Inya ing bonus a pagnasan dang akua,
    King uli ning welga mitdang anting bula;
    “Makanyan man” nganang Tatang ku kang Ima,
    “Bukas lumawe ku kang kumpareng Tura”.

    Ing kumpareng Tura di Ima at Tatang,
    Kesing anak de at yang kakung tegawan
    Keng binyag nung inya yang deti asahan
    Lapitan king ba’lang makiliwas mu man.

    Minuli ya’y Tatang madadalumdum na,
    Magdalang tinape, mapilan de lata;
    “Y kumpareng Tura masakit ya pala,
    At maluat nia naman kanung e magobra.

    Pero king agya mang ibat yang mesakit,
    Kang bunsoy atin yang peparalang pilit;
    Mupin, anti na ning masyadu tang gipit,
    Kaibat Pasku ta’nia ibie ing kapalit”.

    Darala na mekad ning mura kung isip
    At pamangilalang dalan a matulid,
    E ko’inintindi nasang paulingid
    Bagkus lihim ku pang karen meginakit.

    Uli ning atin na kung panyali dapat,
    Intasang e ro pa kaku ibye agad;
    Inya makanyan kung aisip maglayas
    Ban ing kaplas kung lub karelang asanak.

    At binalak ku king kanakung sarili
    Ing e ku muli keng pibale-bale mi,
    Anggang e ro asali ding buri kung dili
    A pekasikat a sapatus pin ngeni.

    Keng kalalakad kung mabagal, banayad
    Metung yang pulubi a patikad-tikad
    Babasle keng dalan ing anting sakildap
    Kakung atangalan pilengkung maglakad.

    Pero king agya mang magkakasakit ya
    Keng panlakad niti pagkapilitan na
    Ing miras mekad king nasang puntalan na,
    Bista’t tsinelas man king bitis ala ya.

    King penandit a ita bigla kung aisip
    Ing aku, e ku pin sukat maginakit
    Kang Tatang uli na ning e ya mekakit
    Isali kung sapin karing kakung bitis.

    Kasi, nung isipan banayad atin pang
    Mas makalunus at amak a kabilyan
    Kesa pala kaku a nu’ pin ing anggang
    Sangkap na ning tau kanaku atyu ngan.

    Samantalang ining king dalan ikit ku,
    A maglakad alang sapin agyang nanu,
    Tsinelas man e no pin asulud pihu
    Uli ring bitis nang parehung pikosu.

    Kabang king bili ku a’yalang pinsala
    Agyang suekus la mu o ausan dang ‘bakya’
    Akua kung asulud…inya mas makalma
    Ing bili kesa keng ikit kung masala.

    Ninanu na’mo nung e ku mekasali
    Kareting sapatus a buri kung buri?
    Kesa king y Tatang pilitan keng sali,
    Karin ku aisip mabilis minuli!

    LEAVE A REPLY

    Please enter your comment!
    Please enter your name here