Home Opinion ‘Total ban’ na ing dapat

‘Total ban’ na ing dapat

181
0
SHARE

Pasku ’t bayung banua payapang milabas,
Bistaman atin pang kepakbungan gamat
Karing ngeni ngara pin sobra king kasyas
Kasulit bawalan king e ikakayap.

Pablasang agya mang lubus da’nang balu
Ing deti ala lang ibungang matinu
King bie na ning tau nung e disgrasya mu,
Pero e la’ murin madadala rugu.

At parati da’la muring sasaliwan
Kesa king aliwang bage apapangan,
Nung inya nanu ing apala ring dakal,
Nune mu peligru at kaplas katawan?

Antimurin dening apanugalyan da
Ing papakbung baril ustung bayung banua,
Balu ra nang iti kakambal disgrasya,
Intasang den e la pin makokonsensya?

Inya anti na ning ing pamipapakbung
Baril ampon sobra sikan rebentador,
Iti, nung e ta’na agawang ikontrol,
‘Gamat a bakal’ ing bukud a solusyon.

Para nanu’t iting makanyan a bage
A e makalingad ing iti yang pane
Mitsa ning disgrasya’t dakal na apate,
Yan pabusten tamu pang pakaban a bie?

E king ding gagawang ‘sinturan nang Judas,’
‘pla-pla, whistle bomb at good-bye pilipinas’
Ding kakung amanwan paten tamu’t sukat,
Nung e’ing pamangawa ing ituknang dapat.

Kasi, nung den e la pa murin mamintu,
King kautusan ning kekatang gubyernu,
Dinalan mang banua ing bilangan tamu
Ibat king aldo iti, ing resulta nanu?

Ala! ‘back to zero’ ing kamaulyan na
Nung e la mamintu ding antimo ila,
A makasarili at alang ulaga
Ing king parang tau, nun’e ing karela?

Nung sana kalupa ning karin king Saudi
A sobra kaigpit ing batas da reti;
Ing alak uli ning makabawal iti,
Ala kang akit a magtinda kaniti.

At uli ning kabud keakitanan ya
Ing ninu mang karin marakap magtinda,
Yan king kulungan ing pihung karasan na,
Inya ninung labag king kautusan da?

E na kalupa ning keti Filipinas
A nung insanu ing bawal yang maralas
Kapad da menasa, kasi pin ding batas
Keti kakambal lang grasang mataluras!

LEAVE A REPLY

Please enter your comment!
Please enter your name here