BISTA’t kapilan ke pamu mikilala
at akadaupan palad ing anak na
ning matikding Diputado ning Pampanga,
PATROL Partylist Jorge Bustos, ok ya.
At agyang atyu pa yan keng murang idad
asisiguru tang nung nanu ya kayap
manalakaran ing matenakan nang Dad
keng pamanungkulan – ing tukyan na bakas.
I Jose Antonio Bustos o i “Ton-Ton”
a mepisanmetung inalal dang Mayor
ding residente na ning balen Masantol,
karas keng serbisyo publiko e bulol.
At e ya mangapkap uli ning anad ne
a nung makananung ing serbisyung tune
karing maingatulid malugud aibie,
kase i Congressman, kian nala sinane.
Bukud king i Mayor “Ton-Ton” e ne bayu
king aske ning ngara ‘serbisyo publiko’
meging ‘National Youth chairperson’ ne mismu
ning ‘PATROL Partylist’ inya e ne monu.
Nung ngana aliwang tatak pamagbayu
a pamangasiwa ing buri ring tau,
consultasyon at pisabian king publiku
ing sukat isulung at nung makananu.
(Akutang ku na yan kanita kang “Ton-Ton”
inyang i Congressman Jorge kuanan da kung
mag- ‘Tutor’ karing ‘kids’ nang e pa larinung
mangapampangan ban mitais maranun.
Lalu na para pin kang “Ton-Ton” sakali
ya ing maging Mayor, kailangan keng bili
niti itang agyang sanang ‘mala-nasi’
muping ‘Capampangan’ atin yang agili).
Mapilan karing ken a yuna na niti
ing ‘basic needs’ da ring memalen parati,
ing pangkapaldanan, edukasyon pati
at ding alang obra midinan la reti.
Iti ing umpisa ning Bayung Masantol
a e ra titukan ding minunang Mayor
kilub na ning makaba-kabang panahon,
angga na king ngeni ing luluk i “Ton-Ton”.
At kayantabe ne ing keyang pengari
a PATROL Partylist pin keng pamagsilbi
inya malaut yang mitalabu iti
king e ikakayap na nyan bandang tauli.
Asisiguru tang king pelalung sakdal
a pamangasiwa karin ya magpalpal
at ya malaut yang mitalabu mu man
uli ning sapuan neng pihu ning Congressman.
At e ne pabusten masira pangaku
karing kabalen a pengakuan na rugu
a ing pamagsilbing ‘genuine’ at tutu
ing ipairal nang “Ton-Ton” a masuyu.
Maragul ing keyang kapasalamatan
karing migtiwalang iya ing inalal
ding Masantoleño… a e makalinguan
kabang ing serbisyong tune ing mimiral!
