Nung anti kanyan a balamu ing kusa
tamung papakit ing bage e matampa
lalu karing anak, bisa ka’t e bisa
yan ing kaulyan da keti king masala.
Kasi nung nanu ken ing akamulatan
ning anak, iti ing king isip mitanam,
nung inyasa’t karen ing ‘parental guidance’
yang yantabe tamu kareti, karen ngan.
Antining insanu pa ken ding alagad
ning gubyernu bilang talapag-patupad
karing panuntunan a saligang batas
pero ila ring ken makasnuk a dapat.
Antimo ring pulis, a nu’ ila mismu
ring aliwa pin ken lulto abusadu,
at menasa sangkut king bage e ustu
nanu ing kareti kapanayan tamu?
Iti kareng alang kaladua katawan
asna kalagua reng atake ing alang
lululun a dase, laman na ning dalan
ila ring malaguang itake keng mulang.
Anti ing ikit dang kaybat neng silbahi
ning metung ing bihag da rugung babai,
pete ne at saka silaban pin iti,
yan ban e singo ing sasalikut deti.
A mialiwa klasing bawal a panulu
a ipaynum karing biktima ra mismu,
yan ban e mu naman matuklas nung nanu,
pa mang ebidensya at/o kontrabandu.
Pulis laban mismu king kalupang pulis
ining keng ‘BLACK RIDER’ malino meyakit,
inya makananung ing krimen e migit
malala ‘compared with any other countries’.
E kaya kailangan ing ibayu tana
ing ngeni mabuluk a klasing sistema,
a pamalakad ding ken a makatoka
keng puestu, a nung nu’ parati nang ila.
Partikular karing ‘appointees’ la mu ken
ding makatoka pin keng kamasalesen,
ban ing nanu pa man a sasalikut den
e maging dalan king e sukat ayalben.
Ing nung makananu ta’lang ken alisya
ring anak ampo ring magbaintau pa,
keng matsurang bage ayalben menasa,
‘Board of Censors’ ing ken dapat matuligsa.
At utusan banting ing e karampatan
ipalage kareng sine o nanu man
repasuan da pamu at maingat suryan
ing nanu mang bage malyaring pututan.
Dakal a ‘producers, writers at directors
ing agyang panako, misan ken mung ‘background’
makakit ka ‘of which even they knew its wrong’
bahala ne ngara ken ing ‘Bureau of Censors’!~
