Orasyun ya ing metigtig, iniang Y Orling datang ya,
queta ya pang pasbul eran, inaus ne’ing asawa na.
“Alayu pu,” nganing Abe, “Baquet Inang, nuya minta?”
Tinuru ya ing Casaup,” quen co pu iquit migbanda.”
“Ah! Nucaren? Baquet? Ninu waring cayabe na?”
Milusuc ya qng cusina , caibat, balus yang tinipa!
Selicut ne qng baru na itang pataram nang iquit
qng lamesa ning cusina, a malalagua nang sigmit,
at cabang paintunan na la nung nucarin la micaquit
ing mua nang miraralacdac yang qng lupa na manatsit
bulung-bulung yang dili na at malmurang mangasaquit
qng depat dang catacsilan a dirildil anggang binit.
Y Orling, quetang obra na, abe re deng manalacad
caring mangatas a tore busal ning Menilang syudad,
balang mapupus ing bulan mumuli yang mangiyatad
caring cayang meguing upa lub ning pabulan a singcad,
qng indu na ning bungsu rang magumpisa pang maglacad
caluguran nang Florida, ing acametung nang palad.
King obra, mica balitang ginapang anti mong api
at qng balubug nang Orling misitsit yang atmu catni;
ding panaquitan na canu a darala nang mumuli
gagastusan nong Florida king queang pamamaugui;
inia naman Y Orlando qng tauli nang pamanuli
magdala yang sucal a lub, maquiabe pamamali.
Micatagun, dinatang ya ing capatad nang Florida
ing wali nang mipabating iniang mamamaintau ya;
cabud iquit ne qng pasbul agad na neng aquilala
linucsu yang sinalubung quinaul ne ing wali na;
pati guiguilian nang gule a ilutu na mo sana
lubusan nang acalinguan qng degulan ning tula na.
Tabalu nung nanung sangcan, nung baquet caya ing atsi
inagcat neng mag-imain qng Parque ing queang wali;
caibat dang mecapanialing apisulu da mo deti
migluclucan la king bancu, at carin la misasabi;
quetang e ra camalayan dening aduang miwawali
ing bie ra mamit-amit nang mapupus qng yatung iti.
Dios Co ! Oita Y Orlando, iquit nalang miyagape
detang aduang micapatad, misasabi, mililele
ing api ning pangalalu silsulan neng e na male
tinubud neng magpalalu inaus neng macamate;
telanan ne ing pataram, at pagulung yang linele
cagulutan da ding aduang alang malit manganib bie.
Cabud milapit ya iti, alang cutang, biglang-bigla
inacdac nong liwas-liwas ding aduang mababa calma
“Tacsil,” nganang gugulisac,” qng micacalucu nang mua,
“ing depat yung catacsilan, bayaran yu, icong adua;
penandit pa itang wali meguing banque neng mistula
cabang Y Florida na man iqua na pang migsalita.
“Orling,” nganang singap-singap migsalitang patlud-patlud,
“ ali cu migtacsil queca, wagas ing queca cu lugud,
ing iquit mung casabi cung inacdac mung macagulut
capatad que, dinatang ya ing wali cung mipalaut.”
Caibat nong ayapse deti belag ne ing queang buntuc
mepatlud ing inawa nang sildac na ning tauling siguc.
Cabud abatas nang Orling ing cayang pamagcamali
nginulangul yang masican anting mamulang na wari;
itang laguiu nang Florida ausan neng matning matni
maniad yang capatawaran qng balus nang panugali;
dapot aguiang nang gawan na e na maliaring asubli
itang bie ring micapatad a pitlud nang e mengimi.
O’ alang mumunang sisi, sasabian na ning casebian,
datang ya, pane yang tauli, caibat ning maling depatan;
inia, tao, mimingat ca, e me sa papagbabauan
qng pamisip mu ing camua a sisian mu catataulian;
anti ngeni Y Orlando, carin na lubus gampanan
ing Tauli Nang Pamanisi qng quilub na ning suculan.
Metung Caring atandanan kung poesia nang Pedro Alzadon a pignasan cung isulat pasibayu—rba
queta ya pang pasbul eran, inaus ne’ing asawa na.
“Alayu pu,” nganing Abe, “Baquet Inang, nuya minta?”
Tinuru ya ing Casaup,” quen co pu iquit migbanda.”
“Ah! Nucaren? Baquet? Ninu waring cayabe na?”
Milusuc ya qng cusina , caibat, balus yang tinipa!
Selicut ne qng baru na itang pataram nang iquit
qng lamesa ning cusina, a malalagua nang sigmit,
at cabang paintunan na la nung nucarin la micaquit
ing mua nang miraralacdac yang qng lupa na manatsit
bulung-bulung yang dili na at malmurang mangasaquit
qng depat dang catacsilan a dirildil anggang binit.
Y Orling, quetang obra na, abe re deng manalacad
caring mangatas a tore busal ning Menilang syudad,
balang mapupus ing bulan mumuli yang mangiyatad
caring cayang meguing upa lub ning pabulan a singcad,
qng indu na ning bungsu rang magumpisa pang maglacad
caluguran nang Florida, ing acametung nang palad.
King obra, mica balitang ginapang anti mong api
at qng balubug nang Orling misitsit yang atmu catni;
ding panaquitan na canu a darala nang mumuli
gagastusan nong Florida king queang pamamaugui;
inia naman Y Orlando qng tauli nang pamanuli
magdala yang sucal a lub, maquiabe pamamali.
Micatagun, dinatang ya ing capatad nang Florida
ing wali nang mipabating iniang mamamaintau ya;
cabud iquit ne qng pasbul agad na neng aquilala
linucsu yang sinalubung quinaul ne ing wali na;
pati guiguilian nang gule a ilutu na mo sana
lubusan nang acalinguan qng degulan ning tula na.
Tabalu nung nanung sangcan, nung baquet caya ing atsi
inagcat neng mag-imain qng Parque ing queang wali;
caibat dang mecapanialing apisulu da mo deti
migluclucan la king bancu, at carin la misasabi;
quetang e ra camalayan dening aduang miwawali
ing bie ra mamit-amit nang mapupus qng yatung iti.
Dios Co ! Oita Y Orlando, iquit nalang miyagape
detang aduang micapatad, misasabi, mililele
ing api ning pangalalu silsulan neng e na male
tinubud neng magpalalu inaus neng macamate;
telanan ne ing pataram, at pagulung yang linele
cagulutan da ding aduang alang malit manganib bie.
Cabud milapit ya iti, alang cutang, biglang-bigla
inacdac nong liwas-liwas ding aduang mababa calma
“Tacsil,” nganang gugulisac,” qng micacalucu nang mua,
“ing depat yung catacsilan, bayaran yu, icong adua;
penandit pa itang wali meguing banque neng mistula
cabang Y Florida na man iqua na pang migsalita.
“Orling,” nganang singap-singap migsalitang patlud-patlud,
“ ali cu migtacsil queca, wagas ing queca cu lugud,
ing iquit mung casabi cung inacdac mung macagulut
capatad que, dinatang ya ing wali cung mipalaut.”
Caibat nong ayapse deti belag ne ing queang buntuc
mepatlud ing inawa nang sildac na ning tauling siguc.
Cabud abatas nang Orling ing cayang pamagcamali
nginulangul yang masican anting mamulang na wari;
itang laguiu nang Florida ausan neng matning matni
maniad yang capatawaran qng balus nang panugali;
dapot aguiang nang gawan na e na maliaring asubli
itang bie ring micapatad a pitlud nang e mengimi.
O’ alang mumunang sisi, sasabian na ning casebian,
datang ya, pane yang tauli, caibat ning maling depatan;
inia, tao, mimingat ca, e me sa papagbabauan
qng pamisip mu ing camua a sisian mu catataulian;
anti ngeni Y Orlando, carin na lubus gampanan
ing Tauli Nang Pamanisi qng quilub na ning suculan.
Metung Caring atandanan kung poesia nang Pedro Alzadon a pignasan cung isulat pasibayu—rba
