king makalyu mung palad, pinande me ing bukas
anggyang iyang katawan, papawas maralikat
king bilis ning pangimut, mamalebe king uyat
dayang pane kikibut, ‘lang tuknang balang oras.
kulang ka pegaralan, miras ka obrang banat
mababa ing ganasya, tiis mu ing maging dapat
magsisi bandang tauli, ala nang akarapat
mewili king kalayan, kelingwan ing pangarap.
yang kekang pipagobran, lalu lang mikwa-kwalta
kapurit sasaluran, abeng talapagobra
e da ka papansinan, nung dudulug karela
bisa mang magreklamo, nokarin ka mo munta?
mapalad nung magwelga, ipagkalub ing buri
kayaring pilang bulan, bayu mika-intindi
malas mu nung maymut ya, kumpanyang meging bili
ala yang pakiramdam, nanu man ing malyari.
bisa ka mang mag-eskirol, pero e mu ayamyam
maski daranup na la, pamilyang lilingapan
makisang-metung pilit, king pakikipaglaban
kapilan magtagumpe, maranun sanang datang.
payus nang gugulisak, boses mu ing damdaman
puyat mang tatanggapan, dasan mang kayabakan
mapali-paling kape, sapat na king almusal
karelyebung kalupa, king protesta ila naman.
sigalut nung mimiral, nung ‘tin pamisang-metung
akyabusang manawa, ‘lang oras e masaul
king lamesang makaba, ing pamipulung-pulung
magobra’t mikabandi, mikawaning mikakaul.
talapagobra kayu, tuturing kong bayani
ikayung magpanono, ekonomiya ning laji
nanu man ing obra yu, maragul o malati
dengalan na ning bangsa, sapat mung ikapuri.
kapilan kaya mangat, ikang talapagobra?
nung e muring mamangat, tuknangan tamung bangsa
ninu kekayung adua, ating pamiparsala?
metung aplit kakayud, o gobiernong ating renda?
