(Iting poesia a makaparikil para king “Aldo ning
Amanung Sisuan” a pagmasusian tamu balang tauling
Biernes ning Agosto ya pamung yampang mi para
king malugud yung pamamasa mal ming Kabalen at
Kalalawigan).
Sukat mu ing Mangapampangan tamu!
Nung misapuak ka king labuad ning mal tamung lalawigan
At mamagus karing uyat mu ing dayang Kapampangan,
Potang ding kekang kasabi metung kayu penibatan
Ing pakatandanan tamu, dapat kang mangapampangan.
Lalu na nung ding mingatba a malugud mung pengari
Mamaltuk lang kapampangan pati pipumpunan deti;
Dapat kang mangapampangan uling yan ing manang sabi,
A sukat ipagmairing neng itamung miki-bandi.
Dapat tang mangapampangan ban maramdam keting yatu
Ing sunis nang sari leguan ning mahalan tang amanu;
Dapat tang mangapampangan, uling iti ya ing ustu,
Pablasang e ta Tagalug, Bisaya at Ilukanu.
Dapat tang mangapampangan, uling iniang isaldak ne
Ning Guinu ing Babylonia, yan ing amanu nang binie;
Dapat tang mangapampangan lakuas nung pakisabian te,
Ban king kayaduanan tamu, mulingid Yang masalese.
Dapat tang mangapampangan, uling e ta’ ikarangal
Ing Salita ring banyagang karing dila makapugal;
Dapat tang mangapampangan, at ipalto ing masabal
King amanung bandi tamu, a sukat tang pakamalan.
Dapat tang mangapampangan antining ing pangatau
Makikilala e mu pin bilang meto’ Pilipinu,
Nun’e bilang Kapampangan, mitagurian dayang asu
Pasari na ning kultura at ning kekatang amanu.
Dapat tang mangapampangan ban ing amanung dalise
Lumabung at maniampaga ampo pang sagiwa aske;
Dapat tang mangapampangan, banting sikan at tumibe
Ing pundasyu’ning amanung maybug-aybug nang mipase.
Ing ningning na ning amanu, king ban e tibubus matdâ
Lingapan ya’t pasiknangan, ing kundap- kundap nang salâ
Pablasang nung mabating ne karing danggut tamung dila –
Iti e ta’ne asagip at at yan ganap neng mawala!!!
