O empleado man lang sa ating husgado,
Pero nang dahil sa pagka-usisero
Ni ‘yours truly’ sa ibang nagtutungo rito
Para daluhan ang naka-takdang ‘hearing,’
Marami-rami na ang naringgan natin
Nitong iba’t-ibang reklamo at daing
Hinggil sa usad-pagong nilang usapin.
Ganito anila: halimbawang ikaw
Ay may bista ka r’yan sa ganitong araw,
Walang katiyakan na matutuloy daw
Sa kadahilang baka mabantilaw.
Nand’yan ang posibleng mag-‘file’ ang isa riyan
Ng kung anong ‘Motion’ para ipaliban;
At may mga Piskal na kahit alam n’yan
Na may bista siya tamad pumasok yan.
Ganun din naman ang ibang Abogado,
Na kahit may ‘hearing’ ng naka-‘set’ ito
Sa ganitong araw sa isang munisipyo,
Madalas may bista rin sa Kapitolyo.
Kaya papaano niya magagawang
Siputin pareho kung magkalayo yan?
Suma-total ang posibleng kahantungan
Ay wala maliban sa mapo-postpone lang.
Yan ay matagal na at dati ng sakit
Sa alin pa mandin yatang ‘Court of Justice’;
Minsan si ‘Your Honor’ itong biglang ‘on-leave’
Kahit pa may ‘setting’ siya ng paglilitis.
Alalaon baga, sa puntong nasabi
Ang lahat ng ito dagok sa kliyente,
Matuloy o hindi ang bista ng pobre
Tiyak sisingilin yan ng ‘Attorney’s fee’.
At ayon na rin sa kuwento nitong ilan
Na aking personal na nakapanayam,
Mga Piskal daw po itong karamihan
Na di sumisipot sa bista kung misan.
May mga Attorney din naman daw yata
Na ni kaunting pabor minsan di magawa
Ang sana kapagka’ na-postponed ng bigla,
Kalahati na lang o totally wala.
At ang masaklap sa ibang Abogado
Pagdating sa pera ay ubod ng listo,
Pero pagdating sa harap ng husgado
Animo ay pagong kung kumilos ito.
Trabaho lamang Sir, walang personalan
At walang direktang pinatatamaan,
Kundi ang atin ay obserbasyon lamang
Base na rin sa’ting naging karanasan.
Tulad na lang ng napakasimpleng kaso
Ng ‘relocation’ ng lupa ng anak ko,
Aba’y umabot ng taon sa husgado
Bago naresolba o natapos ito
Sa kapo-postpone’ ng kabilang partido,
Gayong hindi naman siya apektado,
Buti na lang si ‘Judge’ niresolba nito
Matapos magkusang siya’y sumama rito
At ang ‘surveyor’ na aming kinomisyon
Upang i-relocate ang mga ‘metes & bounds,’
At matapos nga ay inihayag nitong
Tapos na’t hintayin na lang ang desisyon.
Kung ang lahat na ng Hukom ay kagaya
Ng ating nabanggit na kusang sumama
Sa ‘site’ para lamang n’yan madetermina
Ang isyu, lahat madaling maresolba!
(At walang kaso na aabot ng siyam-siyam
Sa alin mang korte sa kasalukuyan,
Sanhi lamang nitong ‘red tape’ kadalasan
Na siyang sa ngayon ay tila umiiral!)
