‘Security of tenure’ ing dapat isulung

    266
    0
    SHARE

    (Kasuglung ning milabas a isyu)

    At bonus neng Pasku nung inya pin mekad
    Ding kapitalistang den a kasapakat
    Deting otor na ning sandalan dang batas,
    Inakda re banting agamit deng armas

    Laban karing pakakalulung empleyadu
    A pangilangan dang miregular pihu,
    Pablasang ing tune imbut dang masolu
    Kapilan man e la mipirmi ring tau

    A makipagobra ba’rang aiwasan
    Ing bage-bage a karapatan legal
    Ampon benepisyu a sukat tanggapan
    Ning metung a tau potang matua ne yan.

    Inya keng ‘contractual basis’ a mi-usu,
    Matning asabi tang’ ding ‘employer’ mismu
    Ampo ring ahensya a tatalan tau
    Ilang keng bage yan makinabang ustu.  

    Nanung benepisyu a keta panayan
    Ning taung kaibat na ning anam a bulan,
    Ala neng obra at manintun ne namang
    Bayung aluban na’t malyaring lipatan?

    At nu’ mekad bayu ne naman makakit
    Makaba-kaba ing pamagkakasakit
    A danasan da ring anak na at misis
    Pasari namu ning antiting ‘malpractice’.

    Nung inia kaniting kanakung abasa
    A sinulat na ning mapuring makudta,
    Keni ku aisip ampon abitasa
    Ing misulat dapat iting mesambitla.

    Ban ing paninap nang Amado Hernandez,
    Keni mu man kakung lubus apagsulit
    At miras karing keng gubyernu mumugit
    Ing kalakaran a sukat nang mapalit!

    Inya nung talagang buri ta’lang dinan
    Matatag a obra o kapanintunan
    Ding lakuan dasan na ken ning kasakitan,
    Yan ing munang diling kailangan tutukan

    Ding senadores tang’ mangakung mirinan
    Solusyon ing kelan obra ding keraklan
    A ka-Pilipinu, a ngara e la man
    Mandaywan – keti mu atin lang aluban.

    Ipag-alimbawa ta’nang agawa ra
    Ing ngara keti mu adinan dong’ obra,
    Pero aliwa ing solusyun talaga
    Nune itang sana mika ‘peace of mind’ la.

    King karelang obra king kapamilatan
    Ning ila mipirmi la keng pipagobran,
    At e anti ngeni a parating ‘casual’
    Ing bili ra karing ‘employer’ a dakal.

    Inya keng puntung yan ing tune solusyun,
    Tune reporma’t “Security of Tenure”
    Ing batas a sukat dang munang isulung
    Ding kekatang Diputadu at Senador.

    Ban ing kapamiasnan ding kapitalista
    A ipairal den king sektor ning obra,
    Lubus nang mapatpat at e na gumana
    Ing ‘contractual basis’ e penugalian da

    Pablasang king anti kaniting palakad
    Gagamal lang ustu’t manakitan limpak,
    Kabang ing kalulung keng obra babatak
    Ing pawas, king kanwan niti tatagaktak!

    LEAVE A REPLY

    Please enter your comment!
    Please enter your name here