alalan na naman keti Filipinas,
nung inyasa’t dakal na la ring malisuas
bistaman ing takdang petsa e pa miras.
At nanan da na ren ing sana pati pin
pelalung liblib a lugal antimurin,
akua rang dasan ban ipayabut karing
botanti ing anggang bage mangasanting.
Pero ing tutu na ding aliwa karen
mapalyaring ngeni ra pa aisip den
ing pakirasan da pati sepung balen,
ba’rang pampanan ing kaplastikan da ren.
Kase e mupin neng bayung mag-alalan
kapilan da kata aisip pasyalan?
At ipayabut ing ngara kapagnasan
deting iyangat de bili ing balayan.
At nu’ agyang e ta’la man kakilala
ding dakal kareti nung e keng lagyu ra,
balamu ing maluat ta’nang mibabasa
potang manatu la karing darasan da.
Karaniwan namu kareng pulitiku
ing mapanatu la reti kekatamu;
At den neng aranan da’lang pasibayu
ding kekatang binang maulagang botu.
Dakal la kareti ding neng alalan mu,
kasebyan pin– ngeni ra kata mu balu;
At saka nung nanu la ngan ipangaku
king ba’ra ka tamung abihag a pusu.
Pero potang deti makalukluk na la
at e ra na kata kailangan kanita,
kapilan ta’na mo pin ikit karela
ing kekata lusuk deting panalala?
Kase, neng panahun na mu ning alalan
karin daka tamu aisip pasyalan,
A kalupa ngening atin lang kailangan
inya aganaka ra katang pagsaryan.
At nu’agyang karing tanggapan da reti
ing dasan ta’la ren, e ta’ makapilmi;
Uli ning mas dakal e la lulub deti
a kalupa na ning madalas malyari.
Pablasang ing tune parasan da mekad
(ding aliwa) e ing magserbisyung tapat
keng opisina ra bilang ‘public servant,’
pasari ning atin lang aparting lakad.
A sukat arapan bilang indibidual
a maki sariling negosyo’t kalakal;
At nu’ sekondarya mupin ing opisyal
deting kapasidad antimo ping alal.
Inya nung anti ya karela ing mipuk
king pekamatas a puestu o pamuntuk,
mekad pilan ya pang bulan makalukluk
(kaya) atin ta’nang asangut a buluk.
At maging karening aliwang tatagal
A mibara na keng gastus anggang batal,
Keng pamamie pera king ba’ra lang yalal,
E kaya ing kaban-balen yang mayasual;
Kabud deti ilang mikalmang minugit
king timun ning Balen a e tana ikit
mekalag keng utang karing mapangupit
ampon aliwa pang mataram a kampit!
