Matagal-tagal na ring walang girlfriend si Sam Milby.
Sa pagkakatanda namin, ang huling naging official girlfriend niya na talagang inamin sa publiko ay si Anne Curtis and that was five years ago pa.
After that ay maraming na-link sa kanya pero wala pa siya talagang inamin officially.
Ang latest na na-link sa kanya ay ang beauty queen na si Ariella Arida pero aniya ay waley naman daw kaganapan sa kanila.
“Nag-karaoke kami sa bahay, it was fun, pero wala. Hindi pa kami nag-hang-out since then,” say ni Sam nang makatsikahan namin siya recently.
“She’s beautiful, she’s nice. Pero hindi naman dahil nag-hang-out kami with friends, kailangan may mangyari. Hindi naman ganoon, eh,” say pa ng aktor.
Hindi ba siya naiinggit sa kapatid niya sa Cornerstone Management na si Richard Poon na lumagay na sa tahimik kamakailan?
“Hindi inggit, inspired. Inspiring ang kuwento nila. Hindi naman kailangang ma-pressure. Darating ’yun, I’m still young.”
Mas okay na raw sa ngayon na wala muna siyang girlfriend para makapag-concentrate siya sa work especially now na mayroon siyang seryeng Huwag Ka Lang Mawawala with Judy Ann Santos and KC Concepcion na nagsimula nang umere kagabi.
“Ako, I think, may dahilan para sa lahat. I think, God has a plan. Kasi, if I have a girlfriend right now, kapag na-in-love ako, nakatutok talaga ako sa kanya. Kapag in-love, I’m very focused. So, maybe there’s really a reason,” say pa niya.
Hindi ba niya hinahanap ang feeling ng in love?
“Hindi naman hinahanap, pero nakaka-miss. Nakaka-miss naman. Siyempre, masarap talaga kapag na-in-love,” he said.
