1
Bala ku mo sana akung makayalak
daka’la pala at e la mu bubulad
inia king poema a kakung belangkas
dakal ku sambitlang karela menibat
kapamilatan ku nasa rang ipasiag
ining maliliaring tutung makakamas
at nung atin ku mang apingkil a sugat
panupaya yu sa sakali mang maplas
2.
Dening sablang bageng kakung taladtaran
tanggapan yu’t ali purus ngang katutuan
makaparikil ya karetang tinagal
a memangampanya kanitang alalan
kaibat dang sinambut sinalikut no ngan
pati alino ra e mu na akit man
e anti kanita simpli mung inuman
o bertdey mung gulung karelang tagunan
3.
Ustung panaun na ning pamangampanya
maralas mong akit agiang nukarin pa
binyagan ya man yan kasalan o fiesta
daratang la agiang e mo kinumbira
nung e la man mambag king pamie rang pera
mamitbit lang alak a miki-lagyu ra
at nung ala no mang alak a darala
karetang tindahan pasali la keka
4.
Oneng ngeni agiang karing ating mete
e no pupunta man ban lang makirame
dapot king panaung tatagal la abe
agagawa ra pa ing makipaglame
atin pang korona a karelang babie
bilang panalala king meangu na bie
at king keraklan da nung nu ra la ike
e ra na balu man detang miki-bale
5.
ngeni mo kumbiran king kekang ukasyun
o paralan kayang sulat imbitasyun
agiang numanu kang magbatbat king gabun
langi naka mata e la man tumagun
uling yari na pin naman ing eleksiyun
e no paigastus maniayang panaun
ot e na la mu pin naman mo magdatun
karing bale ra o SM mamagluyun
6.
Nung makanian pala atin lang matulid
ding tau a karing tatagal lalapit
lakuas ketang oras a lipit lang lipit
at nung paniawad dong saup ding masakit
e ta la pin pala asisi nung bakit
karing kandidatu la makatilalid
kanita ra la mu kanu apamusit
uling kalukluk da e ra nala akit
7.
Potang malapit naman ing alalan
ding kakandidatu akit ta no naman
patitingapun lang luluyun king dalan
a anti mo waring alang kapagalan
ita ing oras da ban mamie kasaupan
karing lalapit a taung mangailangan
at ustung mipuk la ketang katungkulan
apin ing panaun na ning salikutan
