1.
Ing nasa kung makiyagum kareng mapiang tala-sulat
Ban lakwas ku lang asanak reng amanung alang salat
Kareng dinam a salita a king labuad kalat-kalat
A nasa kong ayustu la pangayagkas retang sungat.
2
Dapot makananu ku lang tulid retang bukut a salita
Nung ing mismung kayarap ku balid-balid nong bubugka
Makananu kong pakibnu reng titikul nang pawaga
Nung ding supang kung pangara e no buring pisasangga.
3.
Makanyan kung mikakunu, makanyan kung mikelangan
Nung dapat pang ibalayun ing aba kung panagimpan
Karing pisulung amanu at salitang Kapampangan
Ban agamit ko keng ustu ing tune dang kabaldugan.
4.
Makikabagalan ku man kareng kanakung darake
Uling pagpilitan ku lang maging masustasyang gule
A wari mong ortelanu a manintunan pagkabie
Makapupul gintung bunga king libutad ning marangle.
5.
At kaninu ku patimtim ing obra ku ban mapansin
Nung ing timpla na matabang o medyu kulang king sinsin
Siguru nung ulam yamu’t buburan ditak a betsin
Piju ku e kakulangan yumu ing postri kung sagin.
6.
‘Nya pin ing kakung saingsing ala yang siwala bosis
Ban mipanpan itang siguk ampon impit nang panangis
Niting pusung lakwan-dasan uling e biasang maglambis
At e manamulis tsapa karing matas ranggung pulis.
7.
Tutu kawal kung matapat a malugud king amanu
Tala-sulat Kapampangan yamu ing pagmaragul ku
At e kabud makiyumpuk a mukyat king entabladu
Uling binang malaut pang mibantugan lauredu.
8.
Inya kening talipanpan kung Bagse ning Kailugan
Sasagisag ning lugud ku king amanung Kapampangan
Tula ku nang makasulat mangagdakeng kawatasan
Kabang e matatda diwa’ing karamput kung kaisipan.
Poeta Bagse Ning Kailugan
