Ding sablang memalen manayang magbayu
King pamamalakad kaniting gubyernu,
Daka’lang manwla karing Angeleno
I Mayor Pamintuan isulung nang ustu,
Kanita sunlag ya iting balen tamu
Anting bulalako mabilug a yatu.
Buri yung magbayo? Ing kekatang daptan
Gagawang indredus eyo paniwalan,
Ngana, ing “City Hall” bangkaroti ne yan
At ala nang pera nya ero susweldwan
Ding magobra karin… obat eno kutnan
King banang abalu ing tune katutwan.
Dati ing “City Hall” meputut ya sulu
Uli ning dapat dang makalisya’t liku
Detang atyu karin a dimut mu balu,
At detang empliyadong makalunus tutu
Ding karelang sweldu balduga’na lamu
Pati benipisyu mewala pa rugu.
Ngeni king “City Hall” oyan kekong lawan
Ding magobra tamu makatiman langan,
“Up date” ing sweldu ra alang malalakwan
Pati benipisyo tatanggapan do ngan,
Itang magsalita kekong daramdaman
Ing kayang sasabyan purus e katutwan.
Ating magsalita nganing sasabya’na
Detang mamalita king uri adwa la,
Mumuna ila ring myembru ning “mass media”
Tutu ampon pante ing pamalita ra,
Ing pangadwa naman ya ing MIDYAN ngara
Ing mesirang “Juke box” ing kayang kalupa.
Ing “juke box” a sira keka yang baldugan
Itang kayang kanta king balen damdaman,
At uling sira ya ing maldug ninu man
Agyang kalaskas mu pilmi nang ipalwal,
Ing kayang salitang pawang kalaraman
Inya suryan tamu ing kayang sasabyan.
King patirik-tirik sabi na ting gintu
Bista’t ing katutwan lubus na nang balu
Detang atyu karin butu’la at bungu,
Kalulung memalen lilili no rugu
Nya ena sasabyan karela ing ing tutu,
ULING KING KABIGWAN BURI NONG MANABU.
Ngana pang sasabi dakal la ring utang
Ning gubyernu ngeni a dapat bayaran,
Agyang ya balu na ding kayang sasabyan
Utang lang milabas “city hall” melakwan,
Karing utang a ren, ninung mamayaran?
Ala’t e aliwa I MAYOR PAMINTUAN!
Amado Gigante
Brgy. Anunas,
Angeles City, Pampanga
