Repair sa Angat Dam, masisimulan sa 2014

    101
    0
    SHARE

    LUNGSOD NG MALOLOS— Inaasahang masisimulan sa susunod na taon ang pagkukumpuni sa Angat Dam matapos maisalin ang isasapribadong bahagi nito sa pamamahala ng Korean Water Resources Corp. (K-Water) sa unang bahagi ng 2014.

    Ngunit ang pahayag na ito ay posibleng hindi matuloy ayon sa naunang pahayag ng isang dam safety expert dahil mahaba pa ang prosesong dadaanan ng pagsasapribado at pagkukumpuni sa dam. Sa isang pahayag na inilabas noong Disyembre 9 ng Power Sector Assets and Liabilities Management Corp. (PSALM), kabilang sa obligasyon ng K-Water ang pagsasagawa ng mandatory rehabilitation sa dam.

    Ang K-Water ay isang kumpanyang Koreano na nagkamit ng kontrata para pamahalaan ang bahagi ng 218-megawatt ng isinasapribadong Angar River Hydro Electrict Power Plant (ARHEPP). Ang ARHEPP ay ang bahagi ng Angat Dam na ginagamit sa paglikha ng kuryente sa pamamagitan ng mga turbinang pinatatakbo ng tubig mula sa dam.

    “Under the ARHEPP operation and maintenance agreement, K-Water has the obligation to perform the mandatory rehabilitation activities to make Angat Dam and its related facilities conform to international standards,” sabi ni Emmanuel Ledesma, pangulo ng PSALM.

    Nilinaw ni Ledesma na ang pagsasagawa ng pag-aaral sa katatagan ng Angat Dam ay isinagawa bago pa ipagkaloob ng PSALM ang kontrata sa K-Water. Iginiit pa niya na maaaring gamitin ng K-Water ang mgas naunang pag-aaral hinggil sa katatagan ng Angat Dam, at maaari din itong magsagawa ng sariling pag-aaral para sa pagbuo ng pinal na disenyo para sa pagpapatibay sa dam.

    “K-Water under the agreement for the non-power components, however, can engage the services of at least
    two independent consultants to conduct its own study,” sabi ni Ledesma. Ayon pa sa pahayag ng PSALM, sinabi naman ni Metropolitan Waterworks and Sewerage System (MWSS) Administrator Gerardo Esquivel na, “Angat Dam and dike rehabilitation is one of the key infrastructure projects of the government which we’re hoping will start next year through K-Water.”

    Ito, ayon kay Esquivel, ay matapos magpulong ang mga kinatawan ng MWSS, PSALM, National Power Corp., K-Water at pamahalaang panglalawigan ng Bulacan noong Nobyembre 20 hinggil sa implementasyon ng panukalang rehabilitasyon sa dam.

    Ayon kay Esquivel, isinasapinal na nila ang mga iskedyul samantalang bumubo na ng modelo ng Angat Dam ang K-Water sa kanilang laboratoryo sa Korea. Ang scale modeling dam ay inaasahang matatapos ngayong Disyembre, at pagkatapos nito ay magsasagawa ng pagsusuri ang K-Water sa mga impormasyong naipon
    na inaasahang matatapos sa Marso 2104.

    “We already gave them a Tonkin and Taylor study. So using this study and their laboratory and whatever independent studies they have, then we’re ready to proceed with the project,” sabi ni Esquivel. “So we hope in the middle of next year, they already have an actual method that will be used in the rehabilitation and the project will already start by then,” dagdag pa niya.

    Ayon pa kay Esquivel, ang pagbuo ng disenyo at pagsasagawa ng rehabilitasyon sa dam ay tatagal ng 42 buwan. Una rito, sinabi ni Inhinyero Roderick Dela Cruz, isang Bulakenyong dam safety expert na nakabase sa California na kung ang K-Water ang gagastos sa pagpapatibay sa Angat Dam ay maaaring matagalan ito.

    Sinabi ni Dela Cruz na metikuloso ang mga K-Water dahil may sarili itong mga dalubhasa sa pag-aaral sa dam. “May posibilidad na hindi gamitin ng K-Water ang pagaaral na isinagawa ng Tonkin & Taylor dahil mas sanay silang gumawa ng pag-aaral sa dam,”sabi ni Dela Cruz patungkol sa anim na buwang feasilibity study sa katatagan ng dam.

    Nilinaw niya na maikli ang anim na buwang ginugol ng Tonkin & Taylor sa pagpaaral, at inihalimbawa na sa Estados Unidos, umaabot sa tatlong taon ang pag-aaral sa dam bago simulan ang rehabilitasyon. Isa sa binigyang pansin ni Dela Cruz ay ang kawalan ng site specific seismic study sa isinagawang pag-aaral ng Tonkin and Taylor.

    Ang site specific seismic study sa Angat Dam ay lubhang mahalaga upang matukoy kung gaano kalakas ang
    lindol na ihahatid ng paggalaw ng Marikina West Valley Fault. Ayon pa kay Dela Cruz isinasaad ng Terms of Reference sa nasabing feasibility study na ang pangunahing dahilan ng pag-aaral ay upang matukoy ang katatagan ng dam.

    Ngunit ayon kay Noel Ortigas, executive vice president ng Engineering and Development Corp. of the Philippines (EDCOP), hindi sila nagsagawa ng site specific seismic study dahil nasasagawa na ng pag-aaral ang Philippine Institute of Volcanology and Seismology (Phivolcs) sa kahabaan ng MWVF.

    Ito naman ay kinumpirma ni Inhinyero Romualdo Beltran ng Napocor Dam Management Division ng kanyang
    sabihing nagsasagawa ng trenching study ang Phivolcs sa MWVF. Gayunpaman, sinabi ni Dela Cruz na gamitin man ng K-Water ang pag-aaral ng Tonkin and Taylor at Phivolcs, magsusuri pa rin ang K-Water upang matiyak ang katatagan ng dam.

    Kasunod nito ay ang pagbuo ng disenyo at aktwal na rehabilitasyon.

    LEAVE A REPLY

    Please enter your comment!
    Please enter your name here