1.
Nanan mu ing rasyun a karelang pamie?
nung makalbug naman king kilub mung bale
at nung mistula yang dagat ing marangle
a menampalasan king tenam mung pale
2.
Nung ding kekang plasdan ikua rang linapo
at limbug a tabun king dintang a dano
ta nu mo nabangnan binulus mung paro?
a lilingapan mu kilub ning aldo’ldo
3.
E ta kelangan ing banwa-banwang rasyun
a pigastusan dang salaping maragul
ing karelang dapat ukulan panaun
nung makananu rang adinan sulusyun
4.
Ing danum albug a banwaan daratang
ustung panau’ning bagyu ampon uran
pilan bilyung pesus na ing masasayang
karetang pruduktung ibat king asikan
5.
Bukud la pa ken ding dalan a buburak
uling neng kauran karin la manambak
kalbaryung maragul karetang lalabas
lakwas na pa karing magaral a anak
6.
Ing danum ning albug misna pa katuling
neng purus basura karetang taguling
king leptos pirosis manganib kang tambing
ustung mituran ka e na ka migising
7.
Uling alang patna urang mibubulus
ken mung pilang aldo suguradung lumbug
at neng baradu la ring sapa at ilug
magpondu ing danum neng e no mamagus
8.
Ing problemang iti malambat nang binâ
at e makalingad karing manibalâ
dapot angga ngeni ala la pang gewâ
pane mung pangaku purus mung salitâ
9.
Kesa king gisanan da la mu ring pondu
king rasyung pamie ra karing balang baryu
gamitan da na la sana king pruyektu
mie dalan ban e na lumbug pasibayu
10.
Isipan me’ing gastus king karelang pamie
maragu’lang pera ustung kinuwenta me
adwang kilung abias mayumu at kape
miki-sardinas pa payless at tinape
11.
kaibat atin ka pang damdamang daralung
karing miyalbugang e midinan rasyun
o ninu pin naman ing e mitas prisyun
nung mirasyunan la retang alang danum
12.
Nung lamiran ya pa ing meging kapitan
salikut na’ing rasyun ya ing makinabang
kambe ring asu na a misasamsaman
king grasyang para sa karing miyalbugan….
