Minuli ne’y Darang Maming king Florida
inaus neng Nanette, kinomusta na ya;
malambat la mu rin misabi keng linya—
kasanting na yata ning pisasabian da;
abalu ku na mu, inyang meyari la,
selita nang Nanette ing pipagkwentuan da.
Ining Darang Maming, uling otsenta ne
inya kadalasan maratun ne bale,
ayisip da kanyan di Dayang at Chele
a adua nang anak, king ya, regaluan de;
ban keta e mainip neng ala yang abe
“digital” yang TV ing kaya ra binie.
At aliwa mu yan, bayang makuswelu,
inabe re pa ing “Channel Pilipinu”,
ban keta ing Ima ayalben no kanu
ding programang Pinoy, karin kekatamu;
uling agyang e ya Tagalog a puru
biasa yang Tagalog, dagul ya man Cebu.
Dapot ala pamang paruminggu ata
kening “Pilipino Channel” ne sinawa;
pepatanggal ne pin king keyang pangamua
at e na ne buring akit pang bitasa;
makananu kanung e ne man masora
ing sabing Tagalog ikwa reng asira!
Agpang keng amanu na ning Darang Maming
ing Tagalog kanu, mesira ya tabling,
bagyang kabid kanu, ding magmamagaling
mamamag-english lang balamu malasing;
ngana pa, nung e la talagang basuasing
ot manimbentu lang salitang matabsing.
Ing prisyun na kanu mitatas ya ata
kening “Taglis” aining makakultang daya.
nung e re adinan istasyun Bisaya
keni ne pa kanung piyalben Kastila;
ding kastila, ngana, diretsu la dila
e re abayanan pa-inglis-inglis pa.
Makabuisit kanu at makasumami
ing pamakiramdam keng sabing binabi;
dening managalug balid la kunwari
mamag-inglis la pang palipit at mali;
inya ing Tagalog mibaba ya uri
mesalampitak yang meging salwak-sabi.
Kaibat nang akwentung Nanette ing makanyan
mibule-bule ku, anting Kapampangan;
kase ing Tagalog, nung pitutuliran
ya ing talangkibing matsura kabilyan
ing salitang “Taglis” nung salita ya man
ya ing mangikuldas king tronu nang siduan!
E wari ulina ning leguan na’t timyas
pinuk deng Tagalog king tronu nang matas
kaibat nang mitangal meto Pilipinas
“Taglis” ya mu pala ing keya mikuldas;
makalunus-lunus ing kalma nang miras
ning mesalawulang dila nang Balagtas.
Ngening ing Tagalog balbal ne terminu
at meging “Taglis” ne karing “medya” tamu,
sukat tang ikutang karing gugubyernu
nung ing “Taglis” ya nang “Wikang Pilipinu?
Ngeni nung ya pin na….misanmetung tamu:
ipaglualu taya ing mal tang amanu.
Ipaglualu taya…ding kekatang bitis
tikdo lang matatag…alang tatalilis;
king amanung sisuan alang paimburis
ban keta ali ya misabugan dungis
misanmetung tamu king matibe bigkis
sagkan ya’t labanan sasalake “Taglis”.
Ining Darang Maming, e ya makikyalam
king pisasabian ning amanu ring tibuan;
dapot sasabian nang alang pakundangan
ing “Taglis” talagang ali ne ayamyam;
Inya, king lagyu na ning amanu tang nuan,
Kabalen, Ing “Taglis”… e taya amyaman.
inaus neng Nanette, kinomusta na ya;
malambat la mu rin misabi keng linya—
kasanting na yata ning pisasabian da;
abalu ku na mu, inyang meyari la,
selita nang Nanette ing pipagkwentuan da.
Ining Darang Maming, uling otsenta ne
inya kadalasan maratun ne bale,
ayisip da kanyan di Dayang at Chele
a adua nang anak, king ya, regaluan de;
ban keta e mainip neng ala yang abe
“digital” yang TV ing kaya ra binie.
At aliwa mu yan, bayang makuswelu,
inabe re pa ing “Channel Pilipinu”,
ban keta ing Ima ayalben no kanu
ding programang Pinoy, karin kekatamu;
uling agyang e ya Tagalog a puru
biasa yang Tagalog, dagul ya man Cebu.
Dapot ala pamang paruminggu ata
kening “Pilipino Channel” ne sinawa;
pepatanggal ne pin king keyang pangamua
at e na ne buring akit pang bitasa;
makananu kanung e ne man masora
ing sabing Tagalog ikwa reng asira!
Agpang keng amanu na ning Darang Maming
ing Tagalog kanu, mesira ya tabling,
bagyang kabid kanu, ding magmamagaling
mamamag-english lang balamu malasing;
ngana pa, nung e la talagang basuasing
ot manimbentu lang salitang matabsing.
Ing prisyun na kanu mitatas ya ata
kening “Taglis” aining makakultang daya.
nung e re adinan istasyun Bisaya
keni ne pa kanung piyalben Kastila;
ding kastila, ngana, diretsu la dila
e re abayanan pa-inglis-inglis pa.
Makabuisit kanu at makasumami
ing pamakiramdam keng sabing binabi;
dening managalug balid la kunwari
mamag-inglis la pang palipit at mali;
inya ing Tagalog mibaba ya uri
mesalampitak yang meging salwak-sabi.
Kaibat nang akwentung Nanette ing makanyan
mibule-bule ku, anting Kapampangan;
kase ing Tagalog, nung pitutuliran
ya ing talangkibing matsura kabilyan
ing salitang “Taglis” nung salita ya man
ya ing mangikuldas king tronu nang siduan!
E wari ulina ning leguan na’t timyas
pinuk deng Tagalog king tronu nang matas
kaibat nang mitangal meto Pilipinas
“Taglis” ya mu pala ing keya mikuldas;
makalunus-lunus ing kalma nang miras
ning mesalawulang dila nang Balagtas.
Ngening ing Tagalog balbal ne terminu
at meging “Taglis” ne karing “medya” tamu,
sukat tang ikutang karing gugubyernu
nung ing “Taglis” ya nang “Wikang Pilipinu?
Ngeni nung ya pin na….misanmetung tamu:
ipaglualu taya ing mal tang amanu.
Ipaglualu taya…ding kekatang bitis
tikdo lang matatag…alang tatalilis;
king amanung sisuan alang paimburis
ban keta ali ya misabugan dungis
misanmetung tamu king matibe bigkis
sagkan ya’t labanan sasalake “Taglis”.
Ining Darang Maming, e ya makikyalam
king pisasabian ning amanu ring tibuan;
dapot sasabian nang alang pakundangan
ing “Taglis” talagang ali ne ayamyam;
Inya, king lagyu na ning amanu tang nuan,
Kabalen, Ing “Taglis”… e taya amyaman.
