MISAN i Satanas, ila ning Dios Anak
apiyagkatan dang lungub karing Night Club;
Gagaligatsu lang sinaganang agad
ding babaing disan dang teterak, ubad.
“Karakal ding ‘fans’ kung disan ta’ken” ngana
ning Satanas kang Lord kabang mamilang ya;
“Tara king pisamban” nganing Ginu kaya,
“karin din kanaku keka’ipakit ku la”.
Karas da sentru na nitang kabalenan
a nu’ing munisipyu karin ya mu naman,
Sapak yang tau ing kilub ning pisamban
karing memanyimba at memangumpisal.
Ating makasiklod kabang mangadi la,
ating mipagkwentu oras na ning misa;
Ating matudtud a balamu puyat ya
ating kabud mu ken mipapagsitsirya.
“Satanas” nganing Dios, “ngamu pa’ya karen
a tiktak karakal taung disan ta’ ken?”
“Ding kaku” ngana ning kitnan, “ila pin den
a e naman tutu ing pamanyimba ren;
At deng manalangin tapat, ilang keka,”
nganang Satan kang Jess ketang oras ita;
“Kasi dakal la pin sana ring sinimba,
Pero ding aliwa e laus king lub da.
Inia nung kareti alang pamagbayu,
Keka pare kung Jess” ngana ning Demonyu,
“Angga king ukuman neng Dad mu ing yatu,
E yo’ aigitan bilang ding kanaku”.
At nung king mata ning Dios anti kanian
ing malilyari king mabilug sikluban
E la pin kaya ken lalung mikarakal
Ding pihung manabu keng larung bubukal?
ITI, king bistaman anti yang pawaga
ning poetang alang aisip aliwa
ban isulat uli ning tikal ne diwa,
sumangid nian ating mayap a balita.
I Jesus mapaliaring malapit neng tipa
dapot e para king ita’ng lelangan Na
at ing yatung iting karinan ning sala,
silaban Na ne keng penandit a ita!
Nun’e ituru Na ing nung makananu
ing mie mapayapa keti babo yatu,
kapamilatan ning dapat makatau
at king pusu’t diwa maki- Apung Ginu.
Pero nung ing tau, sumangid na niti
king karokan ya pa murin manatili,
e tana apukul king Ginu ing sisi,
nun’e kekatamu murin bandang tauli.
Kaibat nung itamu ken ta magdatila
king e sukat ampon e na katutula
ning Dios a linalang keti king masala,
kanita na mekad magwakas ing sabla.
Pablasang nanu mang lalam Nang upaya
alang kapilisian at e pin mikabla,
yang maliari at nung nanu itang ula
yang ipatupad ning Dios a Mayupaya!
