Kung bakit sa ngayon ay medyo mabigat
At magastos ang magpa-aral ng anak,
Ya’y bunsod ng taon-taon tumataas
Ang ‘tuition fee’ sa halos lahat ng antas;
At kung saan pati gamit sa iskwela
Ng mga bata ay pamahal lagi na,
Partikular na ang librong gamit nila
Na papalit-palit at di lang iisa
Itong taon-taon ay pabago-bago
Ang nilalaman n’yan at saka disenyo,
Kung kaya imbes magamit uli ito
Ng nakababata, basura nang piho
Pagkat ito na rin ang pinaka-‘workbook’
Nitong mga bata sa kanilang ‘homework’
Kung saan bawat katanungan at sagot
Ay naisulat na rin syempre sa loob.
Kaya papano pa nga yan magagamit
Ng nakababatang kanilang kapatid
Kung kagaya nitong lahat nakatitik
Sa bawat pahina ng aklat na gamit?
Isa lamang yan sa posibleng dahilan
Kung bakit ang edukasyon ay pamahal
Sa halos lahat ng antas o baitang
Ng pandayan ng isip at karunungan.
Kasama na rito ang ubod ng dami
Nitong kuaderno ng mga istudyante,
Kaya halos magkanda-kuba parati
Ang bata – sa kanyang pagpasok sa klase.
Kasi nga, bukod sa sobrang daming aklat
Na di naman nila nagagamit lahat,
Liban sa ‘notebook’ pa nitong sangkatutak
Natural lamang na ang bag ay bibigat
At halos hindi na mabitbit ng bata
Sa kanyang pagpasok, kung siya ay wala
Ni isang alalay o katulong kaya
Para bitbitin yan upang di makuba.
Kaya nang dahil siguro sa puntong yan
Ay nagpanukala itong si Congressman
Carmelo Lazatin ng 1st District po riyan,
Na ang ganito ay dapat ipagbawal?
Ng DepEd sa tama’t magandang paraan
Upang ang ganito ay huwag ng tulutan,
Partikular sa mababang paaralan,
Mapa-‘public school’ at/o pribado man.
Pero ang higit na kailangan marahil
Ay itong sana ay lubos ipatigil,
Ang papalit-palit n’yan ng gagamiting
Libro, at iba pang dapat bigyang pansin.
Na kagaya noon, kung saan ang libro
Ni Kuya nang siya itong nasa Grade II
Ay magagamit din ng kasunod nito
Para makatipid pati ang gobyerno.
Sa pagbili nito ng kung anong aklat,
Na magkaminsan ay mali o di tumpak
Ang ilang bagay na doon nakasulat
Kaya ano ang matutuhan at sukat
Ng bata kundi ang maling impormasyon
Na mababasa sa aklat na ganoon?
Kaya marapat lang na muling isulong
Ng pamahalaan ang estilo noon!
