Ating tinalakay ang hinggil kay PNoy,
Na sa ganang ating sariling opinion
Ang impeachment di na kailangang ituloy
O pilitin nating kusa siyang magbitiw
Sanhi nga riyan nitong mga samu’t-saring
Kapalpakan sa pag-ganap ng tungkuling
Malimit magdulot ng kapahamakan din
Gaya nga riyan nitong ikinapahamak
Ng ‘Gallant 44’ nating matatawag,
Na nangamatay nga nang wala sa oras
Dala ng kawalan ni P-Noy ng ingat
Sa pamamalakad at kawalan yata
Ng kaalaman at tamang pang-unawa
Sa ‘chain of command’ na nilabag n’yang kusa
Nang si Alan Purisima’y atasan nga
Niyang pamunuan ang isang maselang
Operasyon na di dapat pakialaman
Nitong suspendidong PNP Chief na yan,
Kaya wala siyang lubos karapatan
Na atasan siya ni Pangulong P-Noy
Sa isang napaka-delikadong misyon;
At nang pumalpak ay umaatikabong
Sisian, turuan ang biglang umusbong.
At todo tanggi ang butihing Pangulo,
Na inatasan niya ang naturang tao
Na pamunuan yan, nang mabuliliyaso
Lang ang operasyon sa Mamasapano?
At isisi nga sa iba ang ‘lapses’ niya,
Sukdang maglubid ng buhangin kumbaga?
Yan ay senyales ng kawalang pag-asa
Ng Inangbayan sa mga tulad nila.
Para pahawakan ng mga maselang
Bagay na posibleng baka higit pa riyan
Kagrabe kumbaga pagdating ng araw,
Kung mananatili yan sa katungkulan.
Kaya marapat lang ang kusang pagbitiw
Ni Chief Purisima sa kanyang tungkulin,
Kaysa ang lahat na ng kanyang ‘Unexplained
Wealth’ ay patuloy na ating busisihin.
At ang hinggil dito sa balak pagsipa
Kay PNoy, kung di siya bumaba ng kusa,
Yan – gaya ng ating nakaraang paksa,
Hintayin na lang ang araw na ‘tinakda
Ng saligang batas at kung hanggang kailan
Siya mananatili d’yan sa Malakanyang
Total labing apat na buwan na lamang
Ang natitira sa ‘terms of office’ po niyan
Kaysa si Jejomar Binay ang pumalit,
Na may samu’t-saring malulubhang tsismis;
Pero ayaw niyang harapin sa Senate
Ang ‘inquiry’ pagkat posibleng maipit
At ngayon pa lamang sira na kumbaga
Si Jejomar Binay sa mata ng masa,
Kung kaya higit na makabubuti pa
Na maghintay tayo sa pagbaba nila.
At pagsapit ng “Election 2016,”
Ay saka na lang natin pakapiliin
Ang mauupong Pangulo’t Bise natin,
Sa hanay ng kapwa nila magagaling.
At gaya ng inaasahan kay PNoy,
Yan gaya ni Gloria ay di rin malayong
Ang kasasapitan ay pagkakakulong
Ng dahil marahil sa ‘graft & corruption!’
