Pasyun ning amanung sisuan

    484
    0
    SHARE
    Kabud migkamit yang laya
    Pilipinas tamung bansa,
    yanang maruruk dang nasa
    ding tatalan king upaya
    ing amanu metung n’ya sa.

    Makanyan dang pikayari
    mika-amanung mag-ari,
    a metipun at mitayi
    ibat king myaliwang dayi
    metung nang salita wari.

    Ing metipun at mepinu
    kapampangan, ilukanu
    bisaya at bikulanu
    at aliwa pang amanu.
    mayaus yang Pilipunu.

    Dapot e mipatupad yan
    ing pisabi mipayalian
    uling detang manungkulan
    a king upaya tatalan
    menasa Tagalug no man.

    Inya nanu ing gewa ra
    ing Tagalug yang linsad da
    yan ing Pilipino ngara
    at yanang pepaturu da
    bilang dake ning kultura.

    Telebisyon man at radyu
    karing tindahan at dyariu
    yang pagamit ning gubyernu
    ing tagalug a amanu
    ing kapampangan alayu.

    Ing Imperyu ning Menila
    pepasakal nong mistula
    ding amanung masaplala
    ban itas ne at ipala
    itang Tagalug nang dila.

    Ketang suluk ya milele
    ing amanu tang makule,
    kabang ining siping bale
    Tagalug a makalele
    gobyernu yang mamalale.

    Ditak man alang salubsub
    a sumbagal karing lulub
    inya manawa yang linub
    ing Tagalug a mengubkub
    king amanu tang mesuklub.

    Mitambalan ya pang lakwas
    karetang linto paliwas
    a kinawani nang landas
    ila pin ding talipandas
    king amanu meging Judas.

    Libe na ning sumuyu la
    king amanu rang amana,
    pemisali ro ding pluma
    at memanagalug na la
    karing dalit da at rima.

    Makanyan ya pangasilu
    ing amanu tamung bigu,
    king ukuman ding palalu
    timpalasanan de rugu
    memaglate ya king palu.

    Alang tuknang deng babarug
    ing salita ring Tagalug,
    inya lunu ya king bugbug
    ing salita rang inirug
    ding dayi ring pampang ilug.

    Kulang na mu eya mate
    karing barug a maglate;
    detang keyang talabante
    tatakut lang makipate
    pota kayabe reng mate.

    Detang keyang disipulu
    ila pa ding meging lilu,
    sikwil de pang e mu nanu
    ining magdusang amanu
    ngara e re balu kanu.

    Ketang makamal nang buntuk
    kena ra koronang suksuk
    dening taksil a bugasuk
    ban mayakit at milusuk
    itang keyang pangalugmuk.

    Ing amanung e sinuku
    merakap ya at mesilu,
    ing atul da ding palalu
    gamat na’t bitis mipaku
    ban malwat yang maghingalu.

    Oita king pangabitin na
    king kurus a pisanan na
    ning amanu tamung mana,
    kaba ning magkasakit ya
    ding Tagalug kaylian da ya.

    Pagluran de at susunu
    tagalistang pesimunu
    ining amanu tang lunu
    malatang neng miparuku
    ketang kayang pangapaku.

    Oreta ding Tagalista
    magsaya la at magkanta,
    Mabuhay…! Mabuhay..!ngara
    mabibiba la king saya ra
    lwid ya ing mal dang kultura.

    Dapot, ing mal tang amanu
    magdusa yang e mu nanu,
    mapapatad ya animu
    king arapan tamu mismu
    kaba ning manalbe tamu.

    Kalupa kung Kapampangan
    dapat mipakde ta na ngan,
    kimut ta nang agnan agnan
    lako ya king bibitayan
    ing amanu ning balayan.

    E tamu dapat sumuku
    bagutan ta la ding paku,
    ban akit da ding patatu
    king bandera yang malutu
    ing iwagwag tang patutu.

    Panaun na ban kanita
    akit da ding Tagalista,
    e ta na makapibata
    king pamanalipusta ra
    king sarili tang kultura.

    Yana, gulisak ta mu ngan
    ban maramdam ing tepangan
    na ning lahing kapampangan,
    paras ta katagalugan…
    e ta malagwang lupigan.

    Yana, sabian tang matutus
    ing panamdam tamung mamyus,
    iligtas ya’t ikalabyus
    ing amanung makalunus
    king pangapaku na king krus.

    Ya na, sabian tamung matni
    daya tamu namang budni
    nya nung atin mnaglahi
    king amanu na ning lahi
    maki pusu tang bayani.

    Yana maglualu tamu ngan
    itang anggang Kapampangan
    sagkan ya at patuknangan
    ing dusa at kamatayasn
    ning amanu ning balayan.

    Yanasa.

    LEAVE A REPLY

    Please enter your comment!
    Please enter your name here