SAYANG NINOY
1.
Linislis me itang tabing a tatacap ketang aldo
misambulat ing aslag nang malambat nang e susungo
ing dalumlum ning limputang misalicut king alino
uli ning dintang a sala pasibayu yang pepalto
2.
Caring pusung mengarimla mistula ca waring api
at meramdam malalagwa itang tagle niting pali
selangian me itang sulu a malwat nang e sisindi
memalatang caring diwa a canita mengapundi
3.
Tinulid mo ring mapilan a prinsipyung mengabucut
at milisyang capanwalan uli ning milalung tacut
ding maragul at malati icua mu lang apibuclud
at ing puersang atipun mu duldul ya waring cucurug
4.
Pitlud me ing tanicala a migapus caring masa
king sistema nang mabangnas ning gubyernung dictadurya
pepakit me itang tuneng lupa na ning democrasya
caibat ning macainip a migit adwang-pulung banwa
5.
Migcapilit cang minuli king balen mung pacamalan
bista’t man ing capalit na masalpac meng camatayan
dapot iti erapan mu alang tacut mung seganan
managumpe ca mu sana king nasa mung catimawan
6.
At ngeni ing democrasyang peninasan mung pagcalub
e pa ganap a mimiral at e mi pa icuang lubus
ding minasang pamagbayu lacwas la pang micucutcut
king saplid ning casakitan a careti miguguyud
7.
Neng ding kecang pigtiwalan a mengacung pamagbayu
ila naman detang sadya a tibatib king gubyernu
sayang, sayang, sayang Ninoy ing gewa mung sacripisyu
e ra dininan ulaga itang mayap mung prinsipyu….
