I
Misdan ya i Berting karing kaklasi na
a misasaglulung linub king iskwela
pupulai la ngan king sobrang takut da
king magdalang suput a babaing matwa
II.
kitnan na la reti nung nanung milyari
mekibat ya’ing metung at kayang sinabi
“atin keng ikit a matsurang babai,
metung yamu mata ngana pang migsisti
III.
Linwal ya i Berting mabilis linakad
pintalan ne iti at sebyanan agad
“ot minta ka keni”? nganang gugulisak
ketang kayang indung karin mipasadsad
IV.
“Pagdala raka mung sukat mung apangan,
pota dumanup ka mangaplas ka atyan”
ngana ning indu nang waring mababaknal
king pamanialita ketang anak nang mal
V
“Ena ko pupunta kening pasibayu,
tatakut la keka ring ka-eskwela ku”
“sige na”, ngaana pang Berting mengamanu
“ing kekang darala pakan mu nang asu”
VI
“Pasensya na anak” ngana niting inda
“nung mitakutan la iti eku serya,
pauli na rugu ning banal kung nasa,
inia sana kaku ena ka mimimwa”
VII.
Mabilis linabas makabang panaun
i Berting Menila karin ne meratun
anggang makyasawa ya at mikapungul
ena ne inulyan indu nang magmalun
VIII.
At misan a aldo ataluntunan ne
ning indu na itang tuknangan nang bale
iniang akit ne ning anak nang pangane
“ating mumu ngana”, “papa palakwan me”
IX.
Lepitan neng Berting itang kayang inang
sinitsitan nemu ban e re damdaman
“e naka pupunta keti kapilan man,
ban ding kakung anak ela mitakutan”
X.
Bigla yang dinatang ing kayang asawa
“ot eme paluban ngana ining matwa”?
mekibat ya’y Berting “dinian ku neng pera,
magpalimus yamu” ing pekibat na pa
XI.
Dapot iniang misan a mika-binyagan
kinumpari de ring kayang kaluguran
uling marine ya myuman nang tegunan
at gagad minuli king karelang lugal
XII.
Kabang magbiyahi ya adalan ne pa
tiknangan dang bale iniang malati ya
makatagilid ne ing kubu rang dampa
at mengalaso na pati pinaud na
XIII.
Aniang iparada ne ing kayang kotsi
seganan deng agad ding kayang kumpari
e maybug mapatlud ing tula ra’t ayli
king makabang kwentung pibuklatan deti
XIV.
Bigla mengutang ya itang kayang pisan
o’ba’t ngeni ka pa naman rugu dintang?
e mu wari balung mete ne i nanang,
keta pamu nganang Duminggung miralan
XV.
Eku balu ngana niting migsalita
metung man kekayu alang memalita
kasi menabilin ya ing kekang ima
ngana ning pari na ikami nang bala
XVI.
Ing metung pang bageng kayang penabilin
nung mate ya kanu ikaming maglibing
“eyu na pabalu ngana pa kang Berting”
ban e mangabala nung nu ya man karin”
XVII.
Papabye na nemu keka ining sulat
bayu mirate king pagkeran nang papag
kinwa neng berting at malalagwang biklat
saka na binasa itang pakasulat
XVIII
“Keka o anak kung tune pakamalan,
ustung mirate ku puntan mu naku man”
“sapat na kaku ing akit dakang myuman”
“bayu ku mawala keti king sikluban”
XIX.
“Ipagkalub mu sa kaul mung matigik,
a eku denasan king bie maligalig,
ban kanita anak king tawling penandit
maging matiwase ing kanakung isip”
XX.
“atandanan ku pa ‘nyang ikang malati
kikilikan daka, panuman a pisngi
dapot ketang misan anting signus wari”
“me-aksidenti ka, king mata metungi”
XXI
“At uli ning kakung lugud a masapsap,
at nasang dinan kang masanting a bukas,
ing metung kung mata pigkalub ke anak,
para king mata mung kanita mebulag”
XXII.
Kanita mebalag ing lua na king mata
king penamdaman nang lunus kang ima na
dapot tawli na ngan ing egana-gana
dakila nang indu ginulut ne kaya…….
