Panalangin para king bie

    588
    0
    SHARE
    MACA-PANAUN E mu quing capagmasusian quing Bulan ning Amanung Sisuan nune igit caring mangapaliaring sucdulan quing carocan quing quecatamung lipunan, pabusten yu cu pung ibie que ing cacung espasyo queting diario cang Most Rev. Monsignor Eugene G. Reyes, ing rector ning Metropolitan Cathedral ning Archdiocese ning San Fernando.

    Ing pangading macatuqui mibaldug ya quing Capampangan ibat king orihinal a Inglis. Pangadian ta ya pu iting metung a panalangin king catahimican, metung a bie kecang sagipan.

    IBPA NING bie, caniting penandit ning catahimican, panangisan mi at panamdaman ming masakit caring capilubluban mi ing daracal a pamacamate caring inosenti at aliua pang misteriosung camatayan ding tau, lalam ning capagnasan mica metung a ligtas at tahimic a capaligiran para caring sabla.

    Pagparalampu ming pagcaluban mu caming pusung biasang kilalang mipnung capasalamatan ban keta pagsicapan ming ipamingua, sesen at pasulungan ing galal ning bie a pigcalub mu kecami at caring sablang tau.

    Pagparalampu ming pagcaluban mu caming pusung kipnuan king capanaligan ban keta alang capagalan ming isacuil ing paralan at cultura ning carahasan at camatayan king kecaming lipunan at layun patatagan caring kecaming familia ding bage-bage babie ulaga at pasulung king bie ning tau.

    Maniclaud cami king kecang arapan ban pagcaluban mu caming malunusan a pusu, ban e cami mapapata o e mi na dirinan pansin man deting pamacamate a mararapat busal mi.

    Magparalampu cami king kecang arapan ban pagcaluban mu caming sicanan lub at tepangan ban e cami manatiling tahimic at e bubulad potang ing bie malalapastangan ya at ing calayan madadacurac ya.

    O Ibpa ning sablang bie, isubli me pu sana ing kecaming bansa king dalan ning catutuan at catuliran, ning lugud at capaglunusan. Amen.

    Virgen de los Remedios, ipanalangin mu cami.

    Santo Cristo del Perdon, pacaluluan mu cami.

    LEAVE A REPLY

    Please enter your comment!
    Please enter your name here