BISTAMAN balu nang mausta ning Irwin
Ing antimong aslag ning aldo, ngana pin
Ding mekabasa king pangane na niting
Aklat, limitadu la munamang tambing,
Dapot ining kadua beit ne pa mu rin.
Nung king minuna nang sinulat a libru
A pemansagan nang ‘Iniang Malati Ku’
Karing dakal, iti minie yang kusuelu,
Katuki nang ‘Iniang Mangalati Tamu’
Pihu, lalu ye pang akaparan ustu.
Ing kekata yampang niting kapagalan
Karing sabla iti makasaup dakal
Uling nung ala nang ken mangangas palual
Librung anti reti a mabie pamasan,
Ala nang mabiasa king Sabi tang menan.
Nung e ne magamit sisuan tang Salita,
Ing pangakilala tamu lubus matda
Bilang meto’ lipi keti king masala;
Inia mangaintulid mu rening maluka
A pigpuyatan na dapat lang mabasa.
At den magsilbi la waring salva vida
King malulumud a pikabaluan mana
Busal ding aliwang lengguaheng bitbit da
Ding sampid mu keti a ngeni ila na
Ring anting sasakal king bie na’t inawa.
Kaministilan mu karing Kapampangan,
Ing sukat deng sesen, linangan, lingapan
Ing Amanu, anti ing karening kambal
A kasulatan a pilit nang pepalual,
At milunsad keti king mal tang balayan.
Inia uli reti, masampat a puge
Ing keya malugud a kakung ibabie
King sipagan niti a’yalang kayarle
At malasakit ban ing banal nang pake
Karing aduang obra lubus managumpe!
Malagad na la mu ring anti kang Nucum
Ing pagsikapan deng isulat ing tungkul
King bie rang delanan, anti rening librung
Pipagalan na at dekayan panaun
Apalimbag na’t pigastusan maragul.
E biru-biru king bie ring talasulat
Ing anti la kareng maulagang aklat
Ding pagkapilitan da reting isulat,
Pablasang bukud king makitagle bayat,
Ing kakambal niti e ditak a puyat.
Inia naman ikeng kapatad na niti
King paniulat bina ming ipagmapuri
Ing atin pang Irwin Nucum angga ngeni
Lilinang, gagambul king mana tang Sabi
A e sukat matda nanumang maliari.
Kabalen, agkatan da kayung tumagun
Keng a beinte kuatru ya’y ti king Robinsons,
Ban ing pamilunsad karing aduang librung
Akda na asaksian ta’ytang gatpanapun
Na ning bulan a’yti ken king mesabing ‘Mall’.
