Pamalsinta king labuad a tibuan

    125
    0
    SHARE

    (Kaugne ning pang-dinalan at limampulu’t metung a banuang (151st ) Aldo nang Kebaitan Andres Bonifacio keng Nobyembre 30, iting poesiang sinulat na, a pemansagan nang “Pag-ibig sa Tinubuang Lupa” kepampanganan ne ning  aluka yung talasuyu bilang panalala king mapuring bayaning Kapampangan)

    INSANU PANG lugud ing makaygit kaya
    king panga-dalise at panga-dakila,
    anti ing pakamal king tibwan a bansa?
    insanu pang lugud? Ala na pin, ala.

    Ulit-ulitan mang basan yan king isip
    at pitunggal-tunggal talastasan pilit
    ing salita at bie a limbag at gulis
    ning meto’ ketawan iti amamasid.

    Pamalsintang banal nung ika ing datang
    king tulid pusu ning ninu’t insanu man,
    lasip taung gubat, kalulu at mangmang
    maging dakila la at kagalang-galang.

    Papuring lubos ing nasa at pigagap
    king balen ning taung ting’ dangal a ingat,
    magkanta, gumale, makda at sumulat
    ing degulan deti karelang papasyag.

    Alang maulaga a e na pigkalub
    ning mal nang pusu king balen a kelukup,
    daya, pagal, belwan, banding pekasinup
    pati bie mimin mang mangapatlud-patlud.

    Bakit? Nanu iting king karagul sakdal
    a keta ampangan pamalsintang banal
    a nu’ malilyari karing kekata mal
    at keta mitaya pati bie rang siwal.

    Ay! Iti ing Indung Balen tamung tibwan,
    ya ing tune Indung bukud amulatan
    ning aslag ning Aldo a pangangawilian
    ampon babie pali king lunong katawan.

    Utang keya iting munang pamamingwa
    ning tyup ning angin a minye lunas bagya
    king puput a pusung e na misukmama
    keng dusa ‘lub ning malalam a talaga

    Kalangkap na niti lugud king Balayan
    king sablang lalo pang king panalala mal
    ibat king masaya’t pungul a maintang
    angga ing katawan dulung ya kutkutan.

    Nanu na pin kapanaun king masayang
    aldo ing asahan karing aldo datang
    ning pangatimawa da reting alipan
    puera karing akit tamu king |Balayan?

    At ding balang impun ampon balang sanga
    ding parang at gubat a makagayuma,
    ilang akit mu ren aganaka mu la
    ing Indu at irug mu masaya na ka.

    Danum nang malino anti waring bubug
    bukal karing batis a kelat king bunduk,
    malambut nang sunis, mabilis a agus
    babye saya karing pusung kipmuan lungkut.

    King karug nang salu king Balen miwale!
    bakas ning milabas mibalut king lumbe
    alang panalala a panayan pane
    nune ing beitan a labuad akit ne.
    (Atin yang kasuglung)

    LEAVE A REPLY

    Please enter your comment!
    Please enter your name here