1
Ban apatubu meng matulid ing cuayan
cabang labung ya pa’t mikicalambutan,
iyalcus mune king sucat nang dalanan
a sidya mu king ban cayang taluntunan
2
Ita ing tucyan na at magi nang gabe
cabang daragul ya, ban e ya magbakle
at king matiaga mung canian pamamande
mupul cang diretsung cuayan a matibe
3.
Ing metung a labung, a bayu pang lalsut
busal da ring cuayan ban e ya macuput
manintun yang dalan, pilit neng ipalsut
ing cayang sarili, dagul ya mang bucut
4
at king aske na ning cayang pangatubû
misikit-sikit la retang cayang bucû
e mu ne atulid impun nang linicû
ustung pinwersa me, acua nang mabunglû
5.
Iyubyub me man king malablab a apî
king ba ya mong, lambut king milalung palî
atulid me pin sa, mayan apatukî
e binang maglambat, cusa yang mapaclî
6.
Ugali at isip ning metung a anac
miyulma ya iti nung nu ya mimulat
cabud misane ya king e ustung dapat
idala nang dagul, e muna apatpat
7.
isip da ring anac, king bale mumusbung
ampo king labuad a nung nu la meratun
caring acayabeng cayagnang meragul
a acasulit dang macabang panaun
8
anac a meragul king maling panusig
lalto lang pulpiaru, masias balangidngid
mengari lang cuayan, a tinubung cubit
magcasakit nacang careti mitulid….
