Karapat-dapat mung ing Balen ning Capas
king saguling ini, mimalan yang paldas;
uling metung karing pagmayring nang pantas
mengari yang bulung king tangke melagas.
Ing pantas a Pintor Perfecto Mercado
keting yatu tamu tahimik neng meko;
dapot meko yaman, karing Capasenyo
dakila nang lagyu lalu ne mang linto.
Dakila yang tau, at mekilala ya
king meto kapulwan king kapantasan na,
dapot makalunus…ding e kinilala
kakapampangan lang tatalan king MOKA.
Misampa ya lagyu ban tanggap parangal
king parang ning arte nung nu ya metangal;
dapot ing lagyu na tambing neng metanggal
ban e ya miyabe karing midyan galal.
Ing gewa rang sangkan e taga-Pampanga
Kapampangan la mu ding parangalan da;
keni na maustang pepakit ning MOKA
king atyu keng gabun ing pagbasihan da.
Ing Pintor Mercado, balu ra ding malda
king Kapampangan ya king laman at daya
at Kapampangan ya king pamagsalita
uling Kapampangan ya pusu at diwa.
Dapot ding king MOKA e ra pinsinan yan
uling king Pampanga e ya manuknangan;
balamu ing lalto nung pitutuliran
ding memalen Capas e la Kapampangan.
Ing depat ning MOKA a atmu kasakit
kang Pintor Mercadong minakmul king payit;
ing Balen ning Capas ya ing menasakit
at karing memalen kaplas yang mirimit.
Ngeni, ining taung pantas at dakila
lubusan neng mako keti king masala;
dapot kapilan man e malyaring mapda
ing depat ning MOKA king maplas nang kalma.
Dapot ding makudta ning Berding Parnaso
pupuge la kaya king rima at berso
at yang pabakal da king kayang paglako
ing pamangilalang dakila yang henyo.
Perfecto Mercado kaya ing dangalan
pantas ne ning arte a sukat talangan;
pagmaragul taya’t puryan, itamu ngan,
ing kabalen tamung tune Kapampangan.
