I
O balen nanung milyari, karing anak mung aligan? a mengakung ipuk daka, ketang matas a kabilian nung e la misasanmetung, king mayap a kapakayan a dalan na ning tagumpe, a kekang panagimpanan
II.
nung dusuldit lalto la ring, mangatlus deting patsit king karelang pamibungil, pamigaga king matulid daig do pa ring masangil, a ulimao ampon lasip a kabud na dadalusung, mipanyagpang, mipanginis
III.
Ala na lang kealiwan, karing paniabung a manuk alang oras ing e mu la, damdaman a manulauk inia andat mikikit la, mangatularak la puluk mipamustu, manenaya, nung ninu ring munang marug
IV.
Obat rugu mekanian la, “BALEN”, dening kekang anak akalinguan da na rete, ing usuk mung mangasampat? pauli na ning upaya, melipang la wari utak? o ayasag na ning diablu, karing dapat a marawak?
V.
Pelalung ding alang male, midadame na king gulu antimurin ding magdulap, king pante pante serbisyu at kabud a miniral ing, panugaling benggatibu retang dapat dang lingapan, e la mayayasikasu
VI.
ing konseho da ring balen, neng manaliwa la lupa mibabayu mu naman ing, ipairal dang sistema nung ninu ring manungkulan, ipuestu ro ring tau ra wa man ala lang kagiwan, uli na ning pulitika
VII.
Nukarin ya painturu, ing balen ta’ng pakamalan
nung dening susuyu kayang kekatamung pigtiwalan e la mikakasundu at, maybug-aybug milaklakan kapilanman e ne siro ing sala ning kapayapan
VIII.
Ing kailangan ning balayan ban yang lubus misaplalâ at mikabus ketang kayang kabilyang misna king lugmâ idayu king pusu ra ing, paginakit ampon pang mua at libayan king lugud a, malambat na ring mewala
