1
King kekatang bansa manintun kang obra
nung manakit ka man e ka pa tatasa
bayu ka matanggap aduan do pa keka
retang dokumentu a kailanganan da
SSS, NBI ampo pang diploma
police clearance at ing kekang bio-data
at nung ing beluan mu masyadung dimut pa
mekad malabug pang makapagobra ka
2.
At nung sakaling piun nasa mung pagobran
basureru kaya o mamalis dalan
kusineru, weyter, talapanos pinggan
at sepultureru karetang kutkutan
palto ka pang papil bilang katunayan
a ala kang kasung sukat mung arapan
at nung mesukul ka king bie mung miralan
agiang migbayu ka e raka tanggapan
3.
Pamanintun obra makanian kasulit
nung inia daka’la ring mamagkasakit
mika-obra ka man waring e pa sulit
ing pagal mu ketang sweldu mung kapurit
ing makakamas pang binang makabusit
nung makatupa kang amung na kasungit
king ditak a bage bata nang bubungit
a waring kigli king laksang paginakit
4.
paynawa kang bagya king ba kang miatyat
a gulut ampo ring metikal mung gamat
sabianan naka pang e ka palat-palat
agiang mipapawas nakang maralikat
at king makaale-ale niting dapat
nung e ka mibata akwa meng asikwat
ing makipagobra makanian kabayat
lakuas karing intsik a misna kakunyat
5.
Detang pulitikung menarampas milyun
a mengayatulan king kasung korapsiyun
o retang makalwal at aplit luluyun
mamamangampanya para king eleksiyun
e wari nung surian tamu ing sitwasyun,
labag ing depat da ketang konstitusyun?
dapot ot dirinan dong pamikatagun?
a makatagal king nasa rang pusisyun
6.
Ding manintun obra a mika-asuntu
at miparusa’na king megi rang kasu
ing tsansa ra rugung makapag empleu
mekad ala man king apulung porsientu
imbis mirinan lang upayang magbayu
deti lakuas la mung lalto tarantadu
kaibat mo isukul da lang pasibayu
kabud mekagawa lang bage e ustu
7.
Samantalang detang bisang manungkulan
a atiu karetang kilub ning sukulan
dirinan dong laya ampon karapatan
ban kumandidatu neng ating alalan
at agiang ding taung dimut king kabiasnan
magsilbi la namang makapanungkulan
e wari ila ding dapat dang salakan
aliwa ring taung manintun kabiayan
8.
Pablasang ding taung mangailangan obra
at ding salukuyan a makipagobra
ila ring ring mibubwat king ba yang miyalsa
king matas a bili ing ekonimiya
e ra mo kalupa ring mamulitika
ing kaba’ning balen ing lilimiran da
nung e magbayu ing makaniang sistema
ring pakakalu lakuas lang magdusa…
