(Kasuglung ning milabas a isyu)
Anti na ning buri ta’yang palabungan
kalupa ning sadia ing Sabing itinan,
misanmetung ta’ king banal a parasan
ampon matatag a pamanalakaran.
At e ta’ makiapus king ugali ngara
ding talangka at/o bangilan a ema,
nung nu’ kasebian pin milulutlutan la
ban king datukanan siglulung misampa.
Nune itang sana nanu ya mang bage
a maliari tamung apiugne-ugne
e ta’ ipagkait karing bisang mabe
keng grupu ding talasulat, talagale.
At kenu mang bisang kekata’ mangutang
inggil karing tamak a sukat gamitan,
neng atin lang buring isulat o sabian,
sukat mu ing deti kailangan lang saupan
Karing salitang magagamit madalas
a menasa e pin ustu panga-bigkas,
inia imbes iti masagip yang ganap
lalu reng papalbug king paritak-ditak
Partikular karing keng Radio at TV,
a nung nu’ pin lalung mamate kareti
king keraklan na ning gagamitan deti
a e ustu bigkas at/o pangasabi.
Antimo pin ing salitang ‘agnan-agnan,’
yan e dapat ‘sabe-sabe’ sukat sabyan;
E uling ‘sabay’ ya king Katagalugan
‘Sabe’ ya kekata keti Kapampangan.
Atin mu naman ken, gagamit madalas
king salitang ‘di ba’ keng metung a sikat
a ‘TV station, a matuang e palak
karing insanu man a bayung talakad.
Halimbawa: “di ba pisabi tana yan?”
mali ya, e dapat sabyan anti kanyan;
Nune pin “e wari pisabi tana yan?”
ban e masisira panga-Kapampangan!
Ing salitang ‘tuloy-tuloy’ Tagalug ya,
at ‘bala-balaus’ ing kabaldugan na
king sarili tamung Salita, nung inya
e makatud sabyan ing anti kanita.
Antimurin naman ing pamangamit ‘nga,’
yan e ya mu naman Kapampangan, Kaka!
Kase, king kekatang sariling Salita,
ing katulid niti ‘pin’ ya mung mistula.
E na la ditak ding ken mekapanalbe
kareting istasyun a kakung siglawe,
a nung nu’ tamu pin makarandam pane
salitang e sukat king Sabi ta’ yabe.
Yarin itang imbut ta’yang palabungan
antimo king sadya ing Amanung Sisuan,
nanu’t e tamu pu subukan mangutang
karing ating balu keng bage makanyan?
Ing Aguman Talasulat Capampangan
atin yang asaup banting malarin yan,
Nya bilang Pamuntuk na niting Aguman,
ikami nang kusang mamaluk kasaupan
Karing mangaintulid magnasang mabiasa
king Amanung Sisuan o Salitang mana,
ban mitud king ustu ing maling balu ra’
ding aliwang kabalen a magbibiasa!
