ING KALAMNAN niting kanakung poesia,
Medyu maki-kule yang pampulitika,
Inya ika na pang balang magpasensya
Kening sinulat ku nung asagi ra ka
At akabilang ding kanakung asabal
Kening kakung kolum aisip ipalual,
A makaparikil keng alalang lokal
A marapat kaniang 28 ya’ing bulan
Nung nu’ la mapili karing sibabaryu
Ding karapat-dapat ilukluk king puestu
Kareting sasamal mangampanyang ustu
Ban maging Kapitan at Kagawad tamu.
At nu’ keni’t keta, den e la patugut
Kilub ning aldo-aldo keng baryu lilibut,
O king metung man ken kanitang malaut
Pa pin ing alalan e mu’akapkap lubos?
Simen tala’t pakasuryan miamasamas
Ding dapat ibotu kareting lalatlat;
At agyang malapit me pang kamaganak,
E me sukat yalal nung iti e mayap
Lalu ring mapad keng bisyung bista’t bawal
Pero yang pane rang aplit daramagan,
Deti ilang munang e ta’ dapat yalal
Uli ning e ta’la abaklas keng sugal.
Antimurin karing bisang mag-Kagawad,
Pilinan ta’la ring balu tang’ masipag
At biasang tututul king bage e mayap
A keya papirma ra nung e miyatad.
Ing materyales a para karing ‘rough road’
A sukat magawa king karelang sakup,
Nung nu’ pin keraklan balas mang karamput
O graba ala kang akapkap keng dikut
At burak keng dalan a dapat magawa,
Pero wayta agiang kaputut mu ata
Alang masamyentu, at asna kasala
Ing ‘ghost project’ yamu – at pipitna-pitna
Da’la ring salaping sangkan dang pemayad
King mi-‘deliver’ a ‘construction materials,’
A e digpa agiang kenu mang Kagawad
Kasi pin, e naman talagang miyatad!
