I Bosyung karas keng sobrang kapamyasnan
Tabalu nung ating mipante keng mulang;
Bukud king tusu ne’t maki-kaswapangan,
Tiktak ya katako at kasikan mangan.
Pangingilagan deng bisita i Bosyung
Ding kakilala na a maki okasyun,
Uling ken mung nasi nung ditak ka tinun
Mangudkud kang bangi, pamikakatagun.
Karas keng inuman… malaut yang lasing
Uling pagmulmul na ing sioktong ampon ‘gin’;
Nung mamulutan ya, “laklak” ngara na pin,
Lalu pa’t nung iti kalderetang kambing.
Misan, king metung a pusyun a pintan ku,
Akasulu ke pung mengan iting loku,
A nu’ mipaintagun keraklan king tahu
Ema la at paro, binye rang rigalu.
At kabang ta’na ke miagape mamangan
Karap ding aliwang bisita mu naman,
Apansinan ku ing kaku na ngan iatang
Ing keyang pisimen king lele kung pinggan.
“Ating buring sabyan” ngaku king sarili,
“Ing anti kaniting kimut ning salbahi”;
Makanyan man e ku na inatu iti
Uling menitindi ku karing karap mi.
Malagua’t salita…meyari keng mengan
Ing anggang simi na kaku mibuntun ngan;
Lalto king aku ing dakal dili pengan,
Karing inapag dang ema ampon ulang.
Marine-rine ku’t maybug e mitikdo
Uli ning mitambak kaku’ing balat paro!
Dapot ing dine yan kanaku milako
‘Nyang damdaman ko’ ring misasabi babo.
Ngana ning dimdam kung sinabi ning metung:
“Tiktak ya pin pala kasiba i Bosyung!
Obat pati balat liklak ning simarun,
Lipat ne pa pala katako ing durum!!!”
