“NANU YA ING LAUREL?”

NANU YA ING LAUREL, Ing Laurel nanu ya?
King maslag a kanwan ning meto’ poeta?
Nanu kabaldugan ing lagu’t santing na?
Nanung pakilala ning gintung sangkap na,
King pusu’t panamdam ampo king kaladwa?
Nanu ya ing Laurel? Ing laureal nanu ya?

Tanda ning masampat ning pusu’t dangalan
Kambe na ning tulang alang kapupusan
Kabud miputungan ya king insa mang kanwan
Ing lumbe at lungkut maging kaligayan;
Ing bye keting yatung mipmung kasakitan
Maging himala na ning banwang karinan!

Agyang payanak yang malating-malati
Ing tanggap kaniti biglang yang magmali
Mitas ya at dagul – higante ya wari
Susukdul a buntuk ketang pinan-ari?
Agyang kalulu ya at mababa uri
Akakalimpi re ding sablang bayani.

Dapot iting Laurel sakdal ya kaselan
King taung piniling buri nang putungan
Nung alang pakamal king Amanung Siswan
At ala ing lugud king Indung Balayan;
Nung ala ing tanda na ning kabayanian,
Kusa yang mamako king miputunganan!
(At karing aliwa a alang kagiwan)