BALANG simbang bengi amulatan tana
ing bista’t marimla dakal lang sisimba;
Dakal la mu naman babaing magtinda
arap ning pisamban, makatalatag la.
Aisip nang Oscar ing simba mu naman
uling yamu kabud king bale melakuan;
At ding kayabe na memanyimba la ngan
king primerung simbang bengi kabalenan.
Metung yang babai a makatibumbun
ing atuglapan nang memuklat maranun;
Tinda na panara ampon putu lasun,
bungad ning pisamban, dane na ning pasbul.
Balang din’tang karing dakal a sisimba
kilub ning pisamban kababalaus da;
Dili nang melakuan ning Oscar kanita,
pakikisabian ne magtindang panara.
Pilan mung penandit akilala na ne
i Belen, tubu ya balen Macabebe;
Mesabing babai, likuan ali na ne,
anti yamong guardia a karin migbante.
“Ot e ka sinimba?” ngana ning babai,
e mu pasayangan iting simbang bengi?”;
“Lalu ku mung mikasala” ngana niti
“nung ken lakuan daka a magdili-dili”.
“Oscar,” nganang Belen, “e ka sa manuksu
pota maburu la rening paninda ku;
Mayapa sali ka ban magpanigu ku,
at ba’nang magisan agad ing tinda ku”.
“Nung akung sasali” pekibat nang Oscar,
“pati na magtinda yuli ku na naman;
Ing anggang paninda mu bayaran ku ngan,
iti, pangaku ku, alang kalaraman!
Ing magtinda naman bayaran keng sinta
arapan ning altar patutuan ku” ngana;
Pepabalut na lang Oscar ding panara
ampon aliwa pa ketang oras a ita.
Memayad yang migit king takdang alaga
i Oscar king keyang nipnap a paninda;
E pa mibalut man, mipaintagun keta
meyari na naman ing banal a misa.
Metung yang lalaki ing minunang linual,
kitnan ne i Belen, misdan ya y Oscar;
“Megisan na murin tinda mung kapangan,
muli tana, aku nang mamitbit kanian”.
“Mister,” nganing Oscar, “nanu me’ing magtinda?”
Mekibat ya’y Belen, “akung asawa na”
“Jesus Maria Josep,” mengapakurus ya
ining Oscar karing amanung dimdam na.
Bistaman marimla ikua nang mipawas
ning matikding Oscar a sobra kayagap;
Nung arapat namu lumbug ya at sukat
king penandit a ita king bage merapat.
Tintu niting Oscar king kayang sarili,
ing maging maingat neng maglolo iti,
ban e na maulit ing keya miliari
a e maski ninu didigaan niti.
(Inya ing usuk na karing kayanakan,
e balang malagu agad dang pagloluan;
Pota mangari la king kayang atupan,
Ing apilsintan na… atin neng kekasal!)
Diwa neng Oscar Bundalian
ning Siyudad San Fernando, (P)
