I Tiagu pilan neng aldo lagnat-lagnat
Mamanguku ampon e mamako manas,
Inya nung kanita ya sadia neng payat,
Lalu ya pang ngening meging butul-balat.
Mialiwa nang uyat, balat, bulung dutung
Ing pemanapal da, linaga’t pepaynum;
Dapot ditak man king panulu rang yatul
Alang mekapaldan keya agyang metung.
Angga na king deti mekabalita la
Ing ating doktor a ibat Amerika,
A kabalitan keng sobrang gelingan na,
Inya yang aisip agad pintalan da.
Deting keka ngana “Ibie kung panulu
Peka masanting la mabilug a yatu,
Inya katlung aldo aisisiguru ku
Ing ika” ngara pin, “anti kang migpelu”.
Malagua’t salita minuli lang agad
At iting sinabi ning doktor, merapat;
Ing metung a para milako ya lagnat
Antimurin naman ing inuman dapat.
King sobrang tula na ampon kakusuelu,
E ne menaya pang katlung aldo’y Tiagu;
Kabukasan murin king doktor atilu,
At ngara king doktor masayang migkwentu:
“Kagaling yu palang manulu talaga
Agyang ala kaming seli keng botika”
“O nanung gewa mu?” nganing doktor keya,
“E mu pala seli ing maka-reseta?”
“Ing penabilin yu yamung kakung tikian;
Ing metung king gulut mi ya pu tinapal
At ing kadua doktor ininum ku neman
Kaibat keng linaso king basu denuman!
Asus, asus mali ing intindi reti
King penabilin ning doktor a sinabi
Niti ing metung pin, tatapal ya iti,
Nung inya makanian rugu ing milyari!
Nung misan pin naman king bie na ning tau,
Partikular karing ken e man tinuklu
Karing balitang ding pandayan talinu,
Ing kamalian maging mayap a panulu.
Pablasang ing tutu, tanggapan o ali
Ring antimo itang kalulu ing bili,
Ing Dios king lalam nang upaya, e wari
Gawa yang bage a itud Na ing mali?
Pablasang ngara pin lalam Nang upaya
Ning Ginung Dios a linalang king sabla,
Kasalpantayanan ning tau menasa –
Mangibabo kesa king marok a nasa.
Kasalpantayanan ning metung a tau,
Migit ya nung misan, lalu nung masolu
Ing kapanaligan king Dios a Guinu,
Agyang uyat na ning dikut, makaulu!?
