1.
Nung mibait ka king labuad ning mal tamung lalawigan
at kukuri king uyat mu ining dayang Kapampangan
nung ding taung kasabi mu metung kayu penibatan
tandanan mu sana abe dapat kang mangapampangan
2
Dapat kang mangapampangan uling ding kekang pengari
mamaltuk lang kapampangan at ding pipumpunan deti
dapat kang mangapampangan uling yan ing manang sabi
a sukat mung pakamalan neng itamung miki-bandi
3.
Dapat kang mangapampangan ban maramdam keti yatu
ing sunis nang sari leguan ning mahalan tang amanu
dapat kang mangapampangan uling apin yan ing ustu
pablasang e ka tagalug bisaya at ilukanu
4.
Dapat kang mangapampangan uling iniang isaldak ne
ning Guinu ing babylonia yan ing amanu nang binie
dapat kang mangapampangan lakuas neng pakisabian me
ban king kekang kayaduanan mulingid yang masalese
5.
Dapat kang mangapampangan uling e mo ikarangal
ding amanu ring banyagang king dila mu makapugal
dapat kang mangapampangan palto mu’ing kekang masabal
king salitang bandi tamu a sukat mung pakipagkal
6.
Dapat kang mangapampangan uling ing pangatau mu
makikillala ya e mu bilang tune pilipinu
nun e bilang Kapampangang mibulalag keti yatu
pasari na ning kultura at ning kekata’ng amanu
7.
Dapat kang mangapampangan ban ing amanung dalise
lumabung ya’t maniampaga ampon maniagiwa aske
dapat kang mangapampangan king ban sikan at tumibe
ing pundasyu’ning amanung maybug-aybug nang mipase
8
Ing tindag na ning amanu king ban e tibubus matdâ
lingapan ya’t palablaban ing kundap- kundap nang salâ
pablasang nung e ne sunlag e ta ne akit bitasâ
laklakan ne nitang dulum at kanita ne mawalâ
