MILABAS ing Pasku at ing Bayung Banua,
Iti kanaku e meging maligaya;
Pablasang pilatan deting aduang petsa,
Ing aldo a nu’ing salu melapak ya.
At kanaku anti ya waring mibagsak
Ing banuang katasan king bage e sukat
Gewa king kabangal kung pusu ning gagad
A medikung silo king kislap ding pilak.
Ing apu kung bante yang pepagpirman na
King ‘waiver’ at e na ku pamu penaya
Ban akasabi ke’t akung munye keya
Payntulut bayu ne king O. R. yan dela.
At maging i Dr. Gayat a talagang,
Kang misis, ing bali ‘attending physician,’
E nia mu naman pa penayang dinatang,
Migpropasa ya’ting doktor a lamaran.
Ipagpalage ta’ng makailangan bina
Ing prosesung dapat kang misis magawa,
Sana e ne likwan at penaya na pa
N’yan ing karin dapat mikumpletu’t sabla.
Oneng kasagsagan na pin ning prosesu,
Likwan neng Ramos at narses lang parehu
Ding megobra at n’yang mibaba ya pulsu
i misis, kanita la melisuas ustu.
At kanita ne’ ken mepatad inawa
Ing kapus-palad a kanakung asawa
King gamat ning kabud na mu migpropasa
A mig- ‘dialysis’ ketang oras a’yta.
Dimanda ke, dapot angga na king oras
A’yti, ala ku pang ditmang ayaninag
A justisya uling pilit nang palipat
D.O.J. Manila,’3 years’ na ing milabas.
At keti’ing minunang piskal a tinalan
King asuntu, pepa’–inhibit’ ne, at yan
Kang Tepase mibie, dapot gewa na n’yan
Sildak na’t e na ke niti piyarap man.
Nung mika-milagru at/o ‘hokus-pokus’
Inya angga ngeni, e ke pa mirungut,
Kislap ding salapi ing ken kakung karug
Salu ing posibleng memilatan lubus.
Uling bista’t kaku minaus ne misan
Ing abugadu na, ban ‘out of court’ mi nang
Pisabyan, at mipanareglu na bilang,
Pero anti ra ku mu yatang milangan?
At keng biling ini, anti kung mangapkap
Anti na ning e na ke pa man piyarap
Ning akapalit nang Bolisay, yan agad
Na ping dinismis ken nining Tepase, Grantz.
Mig-MR ku, at ing mosyon ku mirinan
Karampatan aksyon dapot yan angga man
Ngeni, iti kabud mu makatiwangwang,
At ing kalaban ku mig-mosyon ne naman;
At pilit na muring Menila palipat
Ing asunto banting karin ke miyarap;
At nu’ ‘justice delayed, justice denied’ mekad
Ing kening bili ku mamiligurung miras?!
